27 aprel 2017-cı ildə RVT-nin inzibati binasında Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimovun bir qrup İkinci Dünya Müharibəsi veteranları ilə görüşü keçirilmişdir. Görüşdə, həmçinin Səfərbərlik və Hərbi Xidmətə Çağırış üzrə Dövlət Xidmətinin məsul şəxsləri və Respublika Veteranlar Təşkilatının rəhbər əməkdaşları iştirak etmişlər. Tədbir başlanmazdan əvvəl İkinci Dünya, Qarabağ, Əfqanıstan müharibələrində həlak olmuş, həmçinin, Azərbaycanın müstəqilliyi, ərazi bütövlüyü uğrunda canlarından keçmiş şəhidlərimizin xatirəsini 1 dəqiqəlik sükutla yad edilmişdir. Tədbiri giriş sözü ilə Respublika Veteranlar Təşkilatının sədr müavini, ehtiyatda olan polkovnik Cəlil Xəlilov açaraq demişdir: “Yaxın vaxtlarda tərəqqipərvər bəşəriyyət İkinci dünya müharibəsində alman faşizmi üzərində qələbənin 72-ci ildönümünü qeyd edəcək. Belə bir ərəfədə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimovun bir qrup İkinci dünya müharibəsi veteranı ilə görüşə gəlməsi bizim üçün çox xoşdur. Respublika Veteranlar Təşkilatı yarandığı gündən öz işini Azərbaycanın dövlət orqanları, ictimai təşkilatları ilə sıx əlaqədə qurmuşdur. Bu baxımdan, Səfərbərlik və Hərbi Xidmətə Çağırış üzrə Dövlət Xidməti ilə bizim əlaqələrimizin çoxillik tarixi və xüsusi əhəmiyyəti vardır. Hələ keçmiş SSRİ dövründə təməli qoyulmuş bu qarşılıqlı fəaliyyətin xüsusən 2 istiqaməti hər iki tərəf üçün mühüm əhəmiyyət kəsb edir. Bunlardan birincisi müharibə veteranları, əsasən İkinci Dünya Müharibəsi iştirakçıları ilə bağlı fəaliyyət istiqamətidir. İkincisi isə gənclərin, xüsusilə çağrış yaşında olan gənclərin hərbi-vətənpərvərlik ruhunda tərbiyə olunmaları, hərbi xidmətə hazırlanmaları istiqamətidir. Sevindirici haldır ki, hər iki istiqamətdə müvafiq tədbirlərin keçirilməsində Səfərbərlik və Hərbi Xidmətə Çağırış üzrə Dövlət Xidməti daim bizim fəaliyyətmizə dəstək olmuşdur. Bugünki görüşün baş tutması da qeyd olunanlara əyani sübutdur. Ancaq təbii ki, bu sahələrdə qarşılıqlı əməkdaşlıq çərçivəsində görəcəyimiz işlər, birgə keçirəcəyimiz tədbirlər çoxdur. İnanırıq ki, növbəti illərdə Səfərbərlik və Hərbi Xidmətə Çağırış üzrə Dövlət Xidməti və Respublika Veteranlar Təşkilatı bu istiqamətlərdə qarşılıqlı fəaliyyət imkanlarından daha səmərəli istifadə edəcəklər. Bu böyük işdə hamınıza uğurlar arzulayıyıram. İkinci dünya müharibəsində alman faşizmi üzərində qələbənin 72-ci ildönümünü münasibətilə ilə veteranları təbrik edən Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimov onlara möhkəm cansağlığı, gənc nəslin Azərbaycançılıq, vətənpərvərlik ruhunda tərbiyəsində uğurlar arzuladı. Respublika Veteranlar Təşkilatının gənclərin hərbi-vətənpərvərlik ruhunda tərbiyə olunmaları, hərbi xidmətə hazırlanmaları istiqamətindəki fəaliyyətini yüksək qiymətləndirən A.Rəhimov bu işin torpaqlarımızın 20 faizinin Ermənistan hərbi birləşmələrinin işğalı altında olduğu bir vaxtda xüsusi əhəmiyyət kəsb etdiyini vurğuladı. Bu gün Azərbaycanda İkinci dünya müharibəsi veteranlarına dövlət tərəfindən, xüsusilə Azərbaycan Respublikasının Prezidenti, Ali Baş Komandan cənab İlham Əliyev tərəfindən böyük diqqət və qayğı göstərildiyini qeyd edən Xidmət rəisi bugünki görüşün başlıca məqsədinin də məhz bu olduğunu bildirdi. Daha sonra Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimov İkinci dünya müharibəsində Azərbaycanın cəbhəyə verdiyi əvəzsiz töhvələrdən və Azərbaycan Ordusunun aprel döyüşlərində göstərdiyi şücaətlərdən danışdı. Sonda İkinci dünya müharibəsi veteranlarına Dövlət Xidmətinin hədiyyələrini təqdim edərək onlarla hər görüşün əlamətdar hadisə kimi yadda qaldığını vurğuladı. İkinci dünya müharibəsi veteranı Fatma Səttarova Azərbaycan dövlətinin veteranlara göstərdiyi qayğıya görə və general-leytenant cənab Arzu Rəhimovun onlarla görüşə gəldiyi üçün veteranlar adından təşəkkrlərini çatdırdı. Respublika Veteranlar Təşkilatının sədr müavini, ehtiyatda olan polkovnik Cəlil Xəlilov vaxt tapıb veteranlarla görüşə gəldiyinə və onlara verilən bayram hədiyyələrinə görə, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimova bir daha veteranların və öz adımdan minnətdarlığını bildirdi.  

Azərbaycan Respublikası Müharibə, Əmək və Silahlı Qüvvələr Veteranları Təşkilatının 30 illik yubileyi çərçivəsində  17 oktyabr 2018-ci ildə Bakı şəhərində, “Park-İnn” hotelində Respublika Veteranlar Təşkilatının təşkilatçılığı ilə “Müasir dünyada təhlükəsizlik: qlobal və regional çağrışlar” mövzusunda beynəlxalq konfrans keçirilmişdir. Beynəlxalq konfransın iştirakçıları 16 oktyabr 2018-ci ildə ümummilli lider Heydər Əliyevin Fəxri Xiyabandakı məzarını, Şəhidlər Xiyabanını və iki dəfə  Sovet İttifaqı Qəhrəmanı Həzi Aslanovun məzarını ziyarət etmişlər. Dünyanın 17 ölkəsindən yüksək səviyyəli qonaqların, Azərbaycan Respublikasının dövlət orqanları, Parlament üzvləri, akademik və hərbi dairələri, ictimai təşkilatlarının, veteranlar, gənclər və media nümayəndələrinin iştirak etdikləri  tədbir başlamazdan əvvəl onun iştirakçıları bütün müharibə və terror qurbanlarının xatirəsini 1 dəqiqəlik sükutla yad etmişlər. Beynəlxalq konfransı giriş sözü ilə Təşkilatının sədri, general-polkovnik Tofiq Ağahüseynov açmışdır. O, İkinci dünya müharibəsində alman faşizmi üzərində Qələbənin 75-ci ildönümünə hazırlıq çərçivəsində belə aktual mövzuda beynəlxalq konfransın keçirilməsinin mühüm əhəmiyyət kəsb etməsindən danışaraq demişdir: “Bu günkü Beynəlxalq konfransın Azərbaycan Respublikasında keçirilməsi heç də təsadüfi deyil. İkinci dünya müharibəsində alman faşizmi üzərində qələbəyə mühüm töhfələr vermiş Azərbaycan xalqı bu gün özü Ermənistan Respublikasının təcavüzü ilə qarşılaşmış, həmçinin terror hücumlarına məruz qalmışdır. Azərbaycanın 20 faiz ərazisi hazırda Ermənistanın işğalı altındadır. Bu nəinki yalnız bizim ölkəmizin təhlükəsizliyinə qarşı deyil, hətta bütün regiona, dünyaya qarşı yönəlmiş ciddi təhdiddir. Ümid edirik ki, mövzusu birbaşa təhlükəsizliyin təminatı yollarının axtarılması, terrorun bütün forma və təzahürlərinə qarşı mübarizəyə həsr edilmiş bugünki beynəlxalq konfrans regionda və dünyada sülhün bərqərar olunmasına öz töhfəsini verəcəkdir”. Respublika Veteranlar Təşkilatının sədr müavini, ehtiyatda olan polkovnik Cəlil Xəlilov İkinci Dünya müharibəsində alman faşizmi üzərində böyük qələbədə danılmaz payı olan və bu gün terrorçuluğun bütün növ və təzahürlərinə qarşı mübarizədə birmənalı mövqe tutmuş Azərbaycan Respublikasının belə tədbirlərə ev sahibliyi etməsini onun mənəvi haquqi adlandıraraq demişdir: “Bu tədbir həm də xalqımızın bütün insanlığa, terror əleyhinə olan bütün ölkələrə ünvanlanmış sülh mesajlarıdır. Azərbaycan xalqı erməni terrorundan əziyyət çəkmiş xalq kimi bu gün onun qarşısının alınmasında dəyişməz və qətiyyətli mövqeyi ilə seçilir.  Azərbaycan daim də öz ənənələrinə sadiqdir və dünyada sülhün qorunmasında iştirakı özünün başlıca prioritetlərindən hesab edir. Ancaq tədbir iştirakçılarına da məlumdur ki, bizim 20 faiz torpaqlarımız bu gün Ermənistan hərbi birləşmələrinin işğalı altındadır. Ermənistan bu gün də Azərbaycan Respublikasına qarşı təcavüzkarlıq və dövlət səviyyəsində dəstəklənən terror siyasətindən imtina etməmişdir. Azərbaycan Prezidenti möhtərəm İlham Əliyev bütün xarici səfərlərində və ölkəmizdə həyata keçirilən rəsmi görüşlərində xarici dövlət başçıları və beynəlxalq ictimaiyyətin diqqətini dəfələrlə torpaqlarımızın Ermənistan tərəfindən işğal altında saxlanması faktına yönəltmişdir. Çünki təcavüzkarlıqla, terrorçuluqla mübarizə yalnız bir xalqın və dövlətin deyil, özünü sivil dünyanın təmsilçisi sayan hər bir xalqın və dövlətin üzərinə düşən vəzifədir. İkili standartlar kənara qoyulmalı, Ermənistanın birmənalı olaraq təcavüzkar, işğalçı və terroru dəstəkləyən dövlət kimi tanınmalıdır. Məhz belə obyektiv münasibət bölgədə sülhün bərqərar olmasına töhfə verər, yalnız Azərbaycanın ərazi bütövlüyünün və təhlükəsizliyinin təminatı üçün deyil, həmçinin ümumi inkişafa xidmət edən addım olardı. Biz buna ümid edir və məsələnin vaxtında həllini sülhə nail olunmasında, regionun təhlükəsizliyinin təminatında mühüm amil sayırıq”. Sonra Beynəlxalq konfransın iştirakçılarının mövzu üzrə çıxışları dinlənilmiş, məruzə və çıxışlar ətrafında müzakirələr aparılmışdır. RF Prezidenti yanında Rusiya Xalq Təsərrüfatı və dövlət xidməti Akademiyasının professoru, fəlsəfə elmləri doktoru Nizami Məmmədov, “Müstəqil Dövlətlərin Veteranlar İctimai Təşkilatları Beynəlxalq İttifaqı”nın sədr müavini Tkaçenko Vladimir İvanoviç, Respublika Veteranlar Təşkilatının sədr müavini, polkovnik Cəlil Xəlilov, “Dünya Veteranları Federasiyası”nın sədri Dan-Viggo Bergtun, Qazaxıstan Veteranlar İctimai  Birliyinin sədr müavini İsenqulov Aytkali, Ukrayna Veteranlar Təşkilatının sədri Şmakov Viktor Viktoroviç, Azərbaycan Aviasiya Akademiyasının kafedra müdiri, professor İbrahim Quliyev, Gürcüstan Müharibə və Silahlı Qüvvələr Mərkəzi Veteranlar Təşkilatının sədri Şubladze Tengiz Şalvoviç, Belarus Veteranların İctimai Birliyinin sədri Qordeyçuk İvan Arkadyeviç,  RF Prezidenti yanında Rusiya Xalq Təsərrüfatı və dövlət xidməti Akademiyası Jurnalistika Fakültəsinin dekan müavini Qonçarova Yuliya Sergeyevna, AR Prezidenti yanında Strateji Araşdırmalar Mərkəzinin elmi əməkdaşı, hüquq elmləri doktoru, Nəcibə Mustafayeva, Azərbaycan Dillər Universitetinin dosenti, politoloq Oleq Yuryeviç Kuznetçov və başqaları çıxış edərək keçirilən tədbirin əhəmiyyətindən, onun terrorçuluğa qarşı mübarizəyə, beynəlxalq sülhün təminatına töhfə verəcəyinə inandıqlarına əminliklərindən, İkinci dünya müharibəsində alman faşizmi üzərində qələbədə və hazırda sülhün qorunmasında xalqlar birliyinin oynadığı tarixi roldan danışaraq, öz ölkələrində bu istiqamətdə görülən işləri, tədbirləri qeyd etmişlər. Beynəlxalq konfransın işinə Respublika Veteranlar Təşkilatının sədri, general-polkovnik Tofiq Ağahüseynov yekun vurmuşdur. T.Ağahüseynov “Müasir dünyada təhlükəsizlik: qlobal və regional çağrışlar” mövzusunda Azərbaycan Respublikasının paytaxtı, Bakı şəhərində keçirilən Beynəlxalq konfransın işində fəal iştirak etdiklərinə görə çıxışçıların hamısına bir daha təşəkkür etmiş, belə tədbirlərin gələcəkdə də davam etdirilməsinin zəruri olduğunu bildirmişdir.

“Prezident İlham Əliyevin də iştirak etdiyi Münxen konfransı göstərdi ki, Azərbaycan sülh, təhlükəsizlik və tərəfdaşlıq siyasətinə sadiqdir”. Bunu saytımıza açıqlamasında Müharibə, Əmək və Silahlı Qüvvələr Veteranları Təşkilatının sədri, hərbi-siyasi ekspert polkovnik Cəlil Xəlilov bildirib. Polkovnik qeyd edib ki, Prezident İlham Əliyevin Münxendə verdiyi açıqlama və müsahibələr Azərbaycanın ənənəvi siyasi krusuna sadiq qaldığını göstərir: “Azərbaycan hər zaman regionda və dünyada sülhün, təhlükəsizliyin və əməkdaşlığın tərəfdarı olub. Dövlətimizin Cənubi Qafqazda formalaşdırdığı de-fakto sülh şəraiti bu siyasətin ən bariz göstəricisidir. Münxen sülh konfransında da Azərbaycan bütün dünyaya məhz bu msajları verdi. Dövlət başçısı İlham Əliyev media nümayəndələrinə verdiyi müsahibələrdə açıq şəkildə vurğuladı ki, uğur və tərəqqiyə gedən yol məhz sülh və əməkdaşlıqdan keçir. Müzəffər Ali Baş Komandan Cənubi Qafqazda uzunmüddətli sülhə nail olmaq üçün atılması gərəkən addımlara da diqqət çəkdi. Prezident İlham Əliyev vurğuladı ki, rəsmi İrəvanla sülh müqaviləsinin imzalanması üçün Ermənistanın öz konstitusiyasında dəyişikliklər etməsi, Azərbaycana qarşı ərazi iddialarından imtina etməsi vacibdir. Dövlət başçısı vurğuladı ki, əgər günü bu gün Ermənistan konstitusiyasında bu dəyişikliklər edilərsə, o zaman ertəsi gün sülh müqaviləsini imzalamaq mümkündür”. Polkovnik Münxen zülh konfransında Azərbaycanın təhlükəsizlik məsələlərində qlobal miqyasda artan roluna da diqqət çəkdi: “Məlum olduğu kimi, Azərbaycan uzun illərdir ki, Qərbin enerji təhlükəsizliyində mühüm rol oynayır. Bu gün Avropanın bir neçə ölkəsi Azərbaycandan neft-qaz məhsulları idxal edir ki, bu da həmin ölkələrin enerji təhlükəsizliyi baxımından böyük əhəmiyyətə malikdir. Son illərin təcrübəsi göstərir ki, Azərbaycan beynəlxalq dəhliz və  nəqliyyat marşurutarının təhlükəsizliyinin təmini baxımından da böyük uğurlar əldə edib, bu müstəvidə qlobal miqyasdakı mövqeyini ciddi şəkildə möhkəmləndirib. Bütün bunlar onu deməyə əsas verir ki, Azərbaycan dövləti yaxın gələcəkdə Prezident İlham Əliyevin rəhbərliyi altında sülh, təhlükəsizlik və tərəfdaşlıq siyasətini uğurla inkişaf etdirməkdə davam edəcək, yeni dostlar və tərəfdaşlar hesabına beynəlxalq miqyasda nüfuzunu daha da gücləndirəcək”.  

25 iyun 2021-ci il tarixində Rusiya Səfirliyi İnformasiya və Mədəniyyət Mərkəzində Böyük Vətən müharibəsinin 80 illiyi və faşizm üzərində qələbənin 75 illiyinə həsr olunmuş "Tarixi şəxsiyyətlər" jurnalının 43-cü nömrəsinin təqdimat mərasimi yüksək səviyyədə keçirildi. Görüş Rusiya və Azərbaycan birgə əməkdaşlığı çərçivəsində Azərbaycan Veteranlar Şurası və Rusiya Səfirliyi tərəfindən təşkil olunmuşdu. Tədbirə fəxri qonaqlar və media nümayəndələri dəvət olunmuşdu. Qeyd edim ki, sözü gedən jurnalın 43-cü nömrəsi məhz Böyük Vətən müharibəsində faşizm üzərində qələbənin 75 illiyinə həsr olunmuşdur. "Ana Vətən çağırır" devizi altında nəfis tərtibatda çap olunan jurnal redaktorun gərgin əməyinin məhsulu idi. Lakin dünyanın hər yerində tüğyan edən pandemiya dalğası Azərbaycandan da yan keçməmiş, ona görə də təqdimatın keçirilməsi gecikdirilmişdir.Tədbiri giriş sözü ilə mərkəzin əməkdaşı Şişkalova Yelena Konstantinovna açaraq, qonaqları salamladı, dəvəti qəbul edib gəldikləri üçün təşəkkürünü bildirdi. Daha sonra söz qonaqlara verildi.İrek Xaydaroviç Zinnurov - Azərbaycan Respublikasında Rusiya ilə Əməkdaşlıq təmsilçiliyi rəhbəri kimi qonaqları salamladı və bu tədbirdə iştirakından məmnun olduğunu bildirdi.Çıxış üçün söz "Tarixi şəxsiyyətlər" jurnalının baş redaktoru, vətənpərvər insan, gözəl qələm sahibi Xəlil Qarəhmədova verildi. O, jurnalın bu nömrəsinin faşizm üzərində qələbənin 75 illiyinə həsr olunduğunu bir daha vurğuladı. Müharibənin ölüm-itim, qan-qada olduğunu, insanlara fəlakət gətirdiyini, 75 il keçməsinə baxmayaraq, ağrı-acının keçmədiyini, vurulan yaraların qaysaq tutmadığını, amma qələbədən doğan sevincin az da olsa, təşnə qəlblərə su çiləyib odunu döndürməsini və bu qələbədə Azərbaycanın da rolunun böyük olduğunu xüsusi qeyd etdi. Jurnalın ilk səhifəsində Şəhidlər xiyabanı lövhəsi qarşısında Azərbaycan Respublikasının Prezidenti İ.Əliyev və xanımı M. Əliyevanın rəsmlərinin əks etdirilməsi, Ümummilli Ulu Öndər H.Əliyevin 1993-cü ildə Azərbaycana qayıdışı ilə müharibə veteranlarının hüquqlarının bərpa edilməsi, onları "xalqın qızıl fondu" adlandırması faktlarının jurnalda işıqlandırılması müəllifin dövlətə, dövlətçiliyə sadiqliyinin bariz nümunəsidir. Jurnalı vərəqlədikcə müəllifin uzun illər axtarış etdiyinin şahidi olursan.Daha sonra söz Azərbaycan Respublikası Veteranlar Şurasının sədr müavini, ehtiyatda olan polkovnik, siyasi elmlər üzrə fəlsəfə doktoru, dosent, jurnalın baş elmi məsləhətçisi Cəlil Xəlilova verildi. O, çıxışında qələbənin qürurverici bir hiss olduğundan ağızdolusu danışdı. Azərbaycan xalqının qəhrəmanlıq salnaməsindən söz açarkən 1941-1945-ci il müharibəsində həmyerlilərimizin iştirakı və əldə olunan qələbədə onların da xüsusi payı olduğunu qeyd etdi. Müharibədə Azərbaycandan 681 min adamın iştirakını, saysız ölüm və itkinin olduğunu, 416-cı diviziyanın şücaətini, diviziyanın 8 hərbçisinin Sovet İttifaqı Qəhrəmanı adına layiq görüldüyünü, 11 nəfərin Lenin ordeni ilə təltif olunduğunu, Bakı neftçilərinin gərgin əməyi nəticəsində ordunun yanacaqla təminatı qürurla vurğulandı. İki dəfə Sovet İttifaqı Qəhrəmanı H. Aslanovun keçdiyi döyüş yolunun xatlrlanması, həqiqətən də, qürurverici idi. Azərbaycan Veteranlar Şurasının rus, ukrayna, belorus veteranları ilə əlaqəsindən də söz açdı."İnsan Hüquqlarının Qorunması" Əməkdaşlıq Təşkilatının nümayəndəsi Firdovsi Ələkbərov da öz çıxışı və təbrikləri ilə tədbirə yeni rəng qatdı.Tədbirdə Azərbaycanın İvanovka kənd nümayəndəsi İvan Pavloviç Prokovyev də jurnal haqqında öz təəssüratlarını söylədi, redaktora səmimi arzularını bildirdi.Çıxış edənlər həmçinin Azərbaycan Silahlı Qüvvələrinin yaranmasının ildönümü və erməni faşizmi üzərində çaldığımız zəfər münasibətilə bütün hərbçilərimizi və xalqımızı təbrik etdilər.Sonda tədbir iştirakçıları onlar üçün hazırlanmış şirniyyat masasına dəvət olundular. Birgə əməkdaşlığın bundan sonra da davam edəcəyinə əminlik yarandı.Hər kəs bu tədbirdən xoş təəssüratlarla ayrıldı.Biz də saytımızın rəhbəri Rasafil Bayramov başda olmaqla, bütün əməkdaşlarımız adından "Tarixi şəxsiyyətlər" jurnalının baş redaktoru Xəlil Qarəhmədova öz fəaliyyətində daha böyük nailiyyətlər arzu edirik.TAHİRƏ QAFAROVA"İctimai Xəbər Agentliyi"nin direktoru və AtaTV.az portalının redaktoru