Veteran.gov.az xəbər verir ki, Müharibə, Əmək  və Silahlı Qüvvələr Veteranları  Təşkilatının Gənclərin  vətənpərvərlik tərbiyəsi və ideoloji hazırlığı  şöbəsinin əməkdaşları-şöbə müdiri  ehtiyatda olan polkovnik Adil Haqverdiyev, baş  mütəxəssis Nəbi Hacıyev, Nərimanov rayon VT-nın sədri, ehtiyatda olan  polkovnik Elşad Şabanov, BVM-si veteranı Ağababa İskəndərov 13 aprel 2023-cü ildə tədbir təşkil ediblər. Tədbir   Bakı şəhəri Nərimanov   rayonunda yerləşən  1 saylı ASAN xidmət mərkəzində baş tutub. Ulu Öndər Heydər Əliyevin100 illiyi ilə əlaqədar  “Ulu Öndər Heydər Əliyev böyük tarixi şəxsiyyətdir” adlı  tədbirdə Bakı şəhəri Nərimanov rayon 1 saylı ASAN xidmət mərkəzinin direktoru Zabidə Batıyeva, direktor müavini Anar Məmmədov, sektor müavini Xəzər İbrahimli, konüllülər üzrə məsul şəxslər Quliyeva Pərvanə, Mirsədizadə Bəyaz və könüllülər iştirak ediblər. Ulu Öndər Heydər Əliyevin 100 illiyinə həsir edilmiş tədbiri mərkəzin direktoru Zabidə Batıyeva açıb. O,qonaqları tədbir iştirakçılarına təqdim edib. Daha sonra Azərbaycan Respublikasının Dövlət Himni səsləndirilib, vətən uğrunda həlak olan şəhidlərimizin xatirəsi bir dəqiqəlik sükutla yad edilib. Tədbirdə çıxış edən polkovnik Adil Haqverdiyev ilk öncə RVT-nın sədri Fatma Səttarova və sədr müavini, polkovnik Cəlil Xəlilovun salamlarını tədbir iştirakçılarına çatdırıb. Adil Haqverdiyev deyib: “Heydər Əliyevin xalqımızın xoşbəxt rifahı yolunda əvəzedilməz işlər görmüşdür. O, hər zaman  gənclərin sağlam əqidəli, vətənpərvər, savadlı yetişib dövlətimizə layiqli vətəndaş olmaları üçün daima düşünmüş və bu siyasətini həyata keçirmişdir. Hələ Azərbaycan Respublikasının Mərkəzi Komitəsinin Birinci Katibi işlədiyi dövurdə SSRİ-nin  iki yüzdən çox mərkəzi şəhərlərində on beş mindən çox azərbaycanlı tələbənin təhsil almasına nail olmuşdur. Onun ikinci dəfə hakimiyyətə qayıdışı Azərbaycanımızı dağılmaq təhlükəsindən xilas etdi. Böyük çətinliklərə sinə gələn Ulu Öndər bu gün dövlətimizin xilaskarı adlandırılır. Mən əbədi lidermizə, vətən uğrunda həlak olan şəhidlərimizə Allahdan rəhmət diləyirəm”. Sonra Elşad Şabanov cıxış edib. O, işlədiyi dövrdə Heydər Əliyevlə görüşündən xatirələrini tədbir iştirakçıları ilə bölüşüb. Daha sonra BVM-si veteranı Ağababa İskəndərov Ulu Öndərin veteranlara diqqət və qayğısından söhbət açıb. Tədbirin sonunda xatirə şəkli çəkilib.

Bakı, 17 iyul, AZƏRTAC Vətən müharibəsindən dörd ildən çox müddət keçməsinə baxmayaraq, Ermənistan hələ də sülh müqaviləsi imzalamaq istəmir. Son bir ildə bu sahədə müəyyən irəliləyişlər baş versə də, ortada ciddi nəticə yoxdur. Əksinə, biz 44 günlük Vətən müharibəsindən sonra qonşu ölkənin sürətlə silahlandığını, hərbi potensialını genişləndirməyə çalışdığını görürük. Fransa, Hindistan və digər ölkələrdən xeyli miqdarda silah-sursat alan Ermənistan xarici ölkələrin hərbi təlimatçıları hesabına ordusunu yenidən formalaşdırmağa çalışır. Belə bir dönəmdə Ermənistan ilə hansısa dövlətin birgə hərbi təlim keçirməsi xoş mərama xidmət etmir. Hazırkı situasiyada bu cür təlimlər Ermənistanın siyasi-psixoloji baxımdan sülh prosesindən uzaqlaşmasına xidmət edir. Bunu Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov AZƏRTAC-a açıqlamasında bildirib. Polkovnik qeyd edib ki, sülh üçün cəhd göstərməyən Ermənistanda kənar qüvvələrin iştirakı ilə hansısa hərbi təlimin keçirilməsi onların xoş məqsəddən və məramdan uzaq olduğunu göstərir. ABŞ-la Ermənistan arasında keçirilən və hələ də davam edən təlimlər regiondakı sülh prosesinə yaxşı heç nə vəd etmir: “Ümumiyyətlə, sülhdən danışan Ermənistanın kənar güclərlə birgə hərbi təlimlərə böyük maraq göstərməsi rəsmi İrəvanın xoş olmayan niyyətindən xəbər verir. Bu fakt bir daha göstərir ki, Ermənistanda revanşizm əhvali-ruhiyyəsi hələ də davam edir və bəzi qüvvələr 44 günlük Vətən müharibəsindən sonra bölgədə yaranan status-kvonun yenidən dəyişə biləcəyinə ümid edir. Lakin bu ümidlər xam xəyaldan başqa bir şey deyil. Azərbaycan xalqı Vətən müharibəsində qazandığı möhtəşəm Zəfərlə yeni reallıq yaradıb və heç bir qüvvə onu dəyişə bilməz”. Militarizm siyasətinin və revanşist düşüncə tərzinin Ermənistana fəlakətdən başqa heç nə vəd etmədiyini vurğulayan polkovnik deyib: “Yaxşı olar ki, rəsmi İrəvan avantürist xəyallardan əl çəkərək Azərbaycanın sülh səylərini dəstəkləsin. Yalnız bu addım Ermənistanı yeni məğlubiyyətlər, iqtisadi kataklizm və sosial böhrandan xilas edə bilər”.

Moderator.az xəbər verir ki, “Sağlamlığın Qorunması” İctimai Birliyinin və Gədəbəy Rayon İcra Hakimiyyətinin birgə təşkilatçılığı ilə “Gədəbəy Rayonunun Şəhidləri” kitabının onlayn təqdimatı keçirilib.   Təqdimatı giriş sözü ilə açan Yazgül Abdıyeva ‘Gədəbəy Rayonunun Şəhidləri” kitabının Şəhidlərimizə əbədi ehtiram əlaməti məqsədilə çap olunduğunu diqqətə çatdırıb. Təqdimatda Gədəbəy Rayon İcra Hakimiyyətinin başçısı İbrahim Mustafayev, Millət vəkilləri Qənirə Paşayeva, Arzu Nağıyev, Sevinc Hüseynova, kitabın müəllifi Vahid Aslan, professor Maarifə Hacıyeva, professor Mahmud Rüstəmov, Dossent Rəşid Mahmudov, tarixçi-alim Faiq Ələkbərli, Gədəbəy Rayon Ağsaqqallar Şurasının sədri Kərəm Məmmədov, tanınmış yazıçı Elçin Hüseynbəyli, əməkdar artist Nuriyyə Hüseynova, Qazilər Süleyman Abdulla, Baycan Abdullayev, Məzahir Hüseynov, Əmrah Cabbarlı, Elşad İsmayılov, Rusiyada yaşayan həmvətənlərimiz Ülvi Hüseyn, Rizvan Cəfərli , Arif Cəfərov ,Habil Alısoy və digər ziyalılar çıxış etdilər. Təqdimatın sonunda yekun fikir bildirən Yazgül Abdıyeva bir daha vurğuladı ki, bundan öncə təqdimatı keçirilmiş “Gədəbəydə doğulan şairlər” kitabı kimi “Gədəbəy Rayonunun Şəhidləri” kitabı da elimizə-obamıza olan mənəvi borcun timsalında yazılıb və çap olunub.   Kitabın ərsəyə gəlməsində böyük əmək sərf edən Vahid Aslana da mnnətdarlıq ifadə olunub.  

Cəlil Xəlilov: “Bu təxribatlar regionda sülh və təhlükəsizlik üçün ciddi təhdid təşkil edir”   “Beynəlxalq təşkilatlar və qlobal güclər  erməni təxribatlarına soy qoymaq üçün rəsmi İrəvana təzyiq göstərməlidir”   Bunu saytımıza açıqlamasında Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib. Cəlil Xəlilov qeyd edib ki, erməni təxribatları ümumilikdə bütün regionda sülh və təhlükəsizliyi təhdid edir:   “Son vaxtlar Ermənistanın Şuşa, Laçın, Kəlbəcər istiqamətində həyata keçirməyə çalışdığı çoxsaylı təxribatlar, Azərbaycan ordusunun mövqelərini intensiv surətdə atəşə tutması, müəyyən əraziləri ələ keçirmək məqsədi ilə hücum əməliyyatlarının təşkilinə səy göstərməsi müşahidə edilir. Hansı ki, erməni terrorçularının bu kimi addımları bütün regionda sülh və təhlükəsizlik üçün ciddi təhdid təşkil edir. Çünki bu kimi addımlar bölgədə vəziyyəti gərginləşdirməyə xidmət edir ki, bu da regiondakı bütün dövlətlərin maraq və mənafeyinə ziddir. Bu baxımdan həm region dövlətləri, həm qlobal güclər, həm də beynəlxalq təşkilatlar erməni təxribatlarına qəti etirazını bidirməli, bu təxribatlara son qoymaq üçün rəsmi İrəvana təzyiq göstərməlidir.   Bu məsələdə Rusiya sülhməramlılarından da gözləntimiz böyükdür. Çünki bölgədə sülhün, sabitliyin təmininə nəzarət 2020-ci ilin 10 noyabr bəyanatına əsasən məhz bu qüvvələrə həvalə edilib. Lakin təəssüflər olsun ki, son vaxtlar erməni terrorçuları Azərbaycan mövqelərini bir çox hallarda Rusiya sülhməramlılarının nəzarət etdiyi ərazilərdən atəşə tuturlar. Ümid edirik ki, Rusiya tərəfi bu məsələdə üzərinə düşən məsuliyyəti dərk edərək, o cümlədən 10 noyabr bəyanatının müəlliflərindən biri olan prezidentlərinin imzasına hörmət əlaməti olaraq  erməni təxribatlarına qarşı mübarizədə aktivlik sərgiləyəcək.   Heç kim unutmasın ki, Azərbaycan Ordusu istənilən təhdid və təxribatın qarşısını almağa qadirdir və istər Vətən Müharibəsi, istərsə də post-müharibə dönəmində baş verən olaylar bu gerçəyi bir daha sübut edir. Azərbaycanın ərazi bütövlüyünə, suverenliyinə, təhlükəsizliyinə qarşı yönələn istənilən təxribatın qarşısı bundan sonra da ordumuz tərəfindən qətiyyətlə alınacaq, bu təxribatı həyata keçirənlər ciddi şəkildə cəzalandırılacaqlar.   Sonda 16 noyabr tarixində erməni təxribatının qarşısının alınması zamanı həlak olan şəhidlərimizə Allahdan rəhmət, yaralı hərbçilərimizə şəfa diləyirəm”.