Veteran.gov.az xəbər verir ki, Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin Baş direktoru Ruslan Əliyev istehlakçılara müraciət edib.   Müraciətdə deyilir:   “Azəriqaz” təbii qaz təchizatı sahəsində kommunal xidmət göstərən dövlət müəssisəsi olaraq, fəaliyyətində yüksək keyfiyyət və operativ xidmət təqdim etməklə yanaşı, sahə üzrə qanunvericiliyin tələblərinə ciddi riayət etməsini əsas vəzifə kimi dəyərləndirir. Abunəçilərimizə münasibətdə qazın istifadəsi nəticəsində yaranmış borcun ödənilməsi ilə əlaqədar problemlərin həlli istiqamətində əsasən danışıqlar yoluna üstünlük verilir, bu mümkün olmadıqda isə məhkəmə qaydasında məsələyə baxılır. Belə məsələlərdən biri də Cəlilabad Rayon Məhkəməsinin 2(073)-1560/2020 iş nömrəsi üzrə 18.08.2020-ci il tarixli qanuni qüvvəyə minmiş qətnaməsi təşkil edir. Cəlilabad rayonu Komanlı kənd sakini cavabdeh Əbilov Xosrov Təvəkgül oğlunun İstehsalat Birliyinin xeyrinə cəmi 338 manat pul ödəməsi qət olunsa da, cavabdeh borcun ödənilməsindən boyun qaçırır. “Qaz təchizatı haqqında” qanunun 13.6 maddəsinə və Nazirlər Kabinetinin 12 may 2011-ci il tarixli qərarı ilə təsdiq olunmuş “Qazdan istifadə Qaydaları”nın 6.1.4 yarımbəndinə görə, istifadə olunmuş qazın dəyərinin ödənilməməsi qazın verilişinin dayandırılması üçün əsasdır. Qanuni qüvvə almış qətnaməni rəhbər tutaraq, sahə üzrə qanunvericiliyin tələbləri gözlənilərək 22 sentyabr 2021-ci il tarixində qazın verilişinin dayandırılması ilə əlaqədar işlər icra edilərkən cavabdeh 1966-cı il təvəllüdlü qaynaqçı Fərəcov Mətləb Aşur oğluna müxtəlif dərəcəli bədən xəsarəti yetirib, onun üst paltarını cıraraq yararsız hala salıb. Baş vermiş olay müvafiq qaydada aktlaşdırılmış və X.Əbilovun hərəkətindən hüquq-mühafizə orqanına şikayət edilib.   Məlum olduğu kimi qanunvericiliyin tələblərinin gözlənilməsi bütün fiziki və hüquqi şəxslərin, o cümlədən qaz təchizatı ilə əlaqədar yaranmış münasibətlərin iştirakçıları olan həm qaz paylayıcısı, həm də istehlakçı üçün əsas vəzifədir. Nəticə etibarı ilə mən də daxil olmaqla hamımız istehlakçıyıq. Bu prizmadan da irəli gələrək istehlakçıların müraciətlərinə (təklif, istək, şikayət, təşəkkür) daim açıq və əlçatanıq, onlar tərəfindən qaldırılan məsələlərə həssaslıqla yanaşırıq. Unutmayaq ki, təhqirə və fiziki təzyiqə məruz qalan işçimiz də bir istehlakçı, valideyn, övlad və Azərbaycan vətəndaşıdır. “Azəriqaz” dövlət müəssisəsi olaraq öz koorporativ maraqlarını insan və vətəndaşın hüquqlarının üzərində deyil, onların bir istehlakçı kimi hüquqlarının, maraq və mənafelərinin qorunması üzərində qurur.   O, vətəndaş cəmiyyətində müsbət davranış modelinin formalaşdırılması üçün sosial şəbəkələrin imkanlarını, bu şəbəkədə təmsil olunan, o cümlədən sahə üzrə nüfuz sahibi olan iştirakçıların rolunu nəzərə alaraq, sizlərə səslənərək xahiş edir:   - zorakılığın hər hansı bir formasına dözümsüzlük nümayiş etdirilməsində, onların ictimai qınanmasında;   - qarşılıqlı anlaşma və hörmət əsasında problemlərin həll olunmasında bundan sonra da səylərinizi əsirgəməyin.   Biz sizlərə xidmət göstərməyimizlə fəxr edir, “Azəriqaz”a münasibətdə qazandığımız müştəri məmnunluğundan qürür duyuruq!  

Görüşdə şəhid və qazi ailələrinin üzvləri də iştirak edib   Veteran.gov.az xəbər verir ki, Tovuz Rayon İcra Hakimiyyətinin başçısı Məmməd Məmmədov 600-dən yuxarı bal toplayaraq ali məktəblərə qəbul olunaraq tələbə adını qazanan gənclərlə, şəhid və qazi ailələrinin üzvləri ilə görüş keçirib. Azərbaycan Respublikasının Prezidenti cənab İlham Əliyevin və Azərbaycan Respublikasının Birinci-vitse prezidenti Mehriban xanım Əliyevanın təhsilə, gənc nəslin hərtərəfli yetişdirilməsi üçün göstərdiyi mühüm diqqət və qayğının nəticəsi olaraq əldə olunmuş yüksək nəticə münasibətilə valideynləri və təhsil ictimaiyyətini təbrik edən RİH başçısı Məmməd Məmmədov, bu istiqamətdə işlərin yüksələn xətt üzrə davam etdiriləcəyini bir daha diqqətə çatdırıb.   Sonda tələbə adını qazanan şəhid və qazi ailələrinin üzvlərinə, 600-dən yuxarı bal toplayaraq ali məktəblərə qəbul olunan tələblərə rayon İcra Hakimiyyətinin Fəxri Fərmanları və qiymətli hədiyyələri təqdim olunub.  

“Hikmət Hacıyevin ABŞ-n “Newsweek” nəşrində dərc olunmuş məqaləsi, ilk növbədə Azərbaycan dövlətinin qlobal və regional proseslərə münasibətinin göstəricisidir. Eyni zamanda, Azərbaycan ziyalısının beynəlxalq ictimaiyyətə ünvanlanmış həyəcan siqnalı kimi qiymətləndirilməlidir”.  Bunu Moderator.az-a açıqlamasında millət vəkili Nəsib Məhəməliyev bildirib. Millət vəkili qeyd edib ki, Azərbaycan COP29 çərçivəsində dünyanın diqqətini iqlim dəyişiklikləri ilə yanaşı, silahlı münaqişələrə çəkməklə, mühüm missiya həyata keçirməkdədir: “Son illər, “yeni dünya nizamının qurulması” adı altında olduqca ziddiyətli, mürəkkəb və təhlükəli proseslər gedir. Planetimiz sürətlə 3-cü dünya müharibəsinə doğru sürüklənir. Qarşısı alınmasa, nüvə müharibəsi təhlükəsi mövcuddur. Bütün bunlarla yanaşı, planetin qarşısında duran əsas vəzifə, iqlim dəyişikliklərini şərtləndirən qlobal istiləşmə, quraqlıq, ekoloji tarazlığın pozulması və digər problemlərin həllinə yönəlik sistemli mübarizə metodlarının işlənib hazırlanmasıdır. Söhbət, BMT üzvü olan böyüklü kiçikli, bütün dövlətlərin birgə iştirakı ilə, iri maliyyə tutumu tələb edən, qlobal layihələrin icrasından gedir. Bu məsələdə ikili standartlar, ayrı-seçkilik, selektiv yanaşmalar olmamalıdır. Planetin həssas bölgələri müəyyənləşdirilməli, konkret proqramlar icra olunmalıdır. Ən böyük məsuliyyət, sənaye baxımdan inkişaf etmiş, ətraf mühiti və atmosferi çox çirkləndirən, müxtəlif bəhanələrlə Kiot və Paris protokollarını imzalamaqdan yayınan böyük dövlətlərin üzərinə düşür. Hikmət Hacıyevin məqaləsinin digər hissəsi Azərbaycan-Ermənistan münasibətlərindəki son vəziyyəti əks etdirir. İki dövlət arasında əldə olunmuş nailiyyətlər, məxsusi olaraq, vasitəçilər olmadan sülhün mümkünlüyü vurğulanır. COP-29 məzmununa, kütləviliyinə görə, son dərəcə əhəmiyyətli tədbirdir. Belə bir möhtəşəm tribunadan istifadə etməklə, beynəlxalq birliyi sülhə çağırmaq, müharibələrin, münaqişələrin qarşısının alınması üçün çağırış etmək, Azərbaycan dövlətinin sülhpərvər mahiyyətinin göstəricisidir”. Seymur ƏLİYEV  

Cəlil Xəlilov: “Bu, veteranlarımızın ictimai aktivliyi ilə yanaşı, Təşkilatımıza olan münasibətini əks etdirir” “Təşkilatımız Vətən müharibəsi veteranları ilə öz sıralarını sürətlə genişləndirməkdədir”. Bu, veteranlarımızın ictimai aktivliyi ilə yanaşı, Təşkilatımıza olan münasibətini əks etdirir”. Bunu saytımıza açıqlamasında Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib. Polkovnik qeyd edib ki, Müharibə, Əmək və Silahlı Qüvvələr Veteranları Təşkilatının əsas vəzifələrindən biri ən çox diqqət və qayğıya ehtiyacı olan, Azərbaycan dövlətinin daim diqqət mərkəzində olan müharibə veteranlarının   əlaqədar aidiyyəti dövlət orqanları ilə əlaqələndirmək, onları düşündürən məsələləri müvafiq qurumalr qarşısında qaldırmaqdır: “Bütün kateqoriyadan olan veteranların sosial durumunun diqqətdə saxlanılması təşkilatımızın əsas vəzifələrindən biri olaraq qalır. Bildiyiniz kimi, dövlətimiz şəhid ailələri, müharibə əlilləri, qazi və müharibə veteranlarının sosial vəziyyətinin mütəmadi olaraq yaxşılaşdırılmasını daim diqqət mərkəzində saxlayır, bu yöndə miqdarı milyard manatlarla hesablanan nəhəng layihələr həyata keçirir. Məhz dövlətimizin məlum qayğısının nəticəsidir ki, bu gün Azərbaycan həssas kateqoriyadan olan vətəndaşlara göstərilən diqət və qayğıya görə dünyanın bəlkə də ən qabaqcıl dövlətidir. Təbii, bu məsələdə dövlətlə yanaşı, qeyri-hökumət təşkilatları, vətəndaş cəmiyyəti institutları da aktiv rol oynamalı, dövlətin şəhid ailələri, veteranlarla bağlı siyasətinə dəstək verməli, hansısa məmurun laqeyd münasibəti ilə üzləşən veteranların səsinin dövlətə çatdırılmasında yaxından iştirak etməlidir. Unutmamalıyıq ki, həssas kateqoriyadan olan vətəndaşlarımıza yardım etmək, onların arzu və istəklərinə ikiqat diqqətlə yanaşmaq hər birimizin mənəvi borcudur və hər bir azərbaycanlı bu borca sədaqətlə yanaşmalıdır”. Vətəndaşın dövlətlə, onun əlaqədar qurumları ilə əlaqələndirilməsi, problemin qarşılıqlı anlaşma əsasında həlli, vətəndaş hüquqlarının təmin edilməsi, dövlət siyasətinin dəstəklənməsi baxımından olduqca önəmldir. Bu, həm də anti-milli qüvvələrin dövlətimizlə bağlı çirkin məqsədlərinin qarşısını almaq baxımından vacibdir. Bildiyiniz kimi, bəzi qüvvələr var ki, onlar xalqla-dövlət, vətəndaşla-hökumət arasında süni gərginlik yaratmağa, bu gərginlik fonunda öz məkrli niyyətlərinə nail olmağa çalışır. Bunun üçün isə onlar çox vaxt gənclərdən, eləcə də veteranlardan istifadə etməyə səy göstərirlər. Buna görə də Müharibə, Əmək və Silahlı Qüvvələr Veteranları Təşkilatı paytaxt və bölgələrdə keçridiyi çoxsaylı görüşlərdə, konfrans və forumlarda geniş maarifləndirmə işləri həyata keçirir. Bildiririk ki, hər bir vətəndaş onda narazılıq doğuran məsələ ilə bağlı əlaqədar dövlət qurumuna müraciət etməli, problemin hüquqi müstəvidə həllinə nail olmalıdır. Bu baxımdan onlar bizim Təşkilatımız vasitəsi ilə də öz səslərini istənilən dövlət qurumuna çatdıra bilərlər. Biz bugünə qədər olduğu kimi, bundan sonra da veteranlarımıza bu və digər məsələlərdə dəstək olmağa, onlara əlimizdən gələn köməkliyi göstərməyə hazırıq”. Polkovnik bildirib ki, son vaxtlar 44 günlük Vətən müharibəsi iştirakçılarının Müharibə, Əmək və Silahlı Qüvvələr Veteranları Təşkilatına kütləvi şəkildə üzv olması gənclərin, veteranların bu Təşkilata olan münasibətini əks etdirir: Bizim üçün qürurvericidir ki, 44 günlük Vətən müharibəsi iştirakçısı olan gənclərimiz kütləvi şəkildə Təşkilatımıza üzv olur, onun fəaliyyətində yaxından iştirak edirlər. Bu, gənclərimizin aktivliyinin göstəricisi olmaqla yanaşı, həm də onların Müharibə, Əmək və Silahlı Qüvvələr Veteranları Təşkilatına olan münasibətini əks etdirir.  Təbii, üzləşdiyimiz bu mənzərə bizi çox sevindirir, eyni zamanda bizim çiynimzidəki məsuliyyət hissini artırır. Mən inanıram ki, Müzəffər Ali baş Komandan İlham Əliyevin diqqət və qayğısı, dövlətimizin dəstəyi ilə bundan sonra da veteranlarımızı düşündürən bütün məsələlərin həllinə nail olacaq, dövlət və xalq olaraq bütün hədəflərimizi gerçəkləşdirəcəyik. Unutmayaq ki, bütün uğurlarımızın, qələbələrimizin açarı birliyimizdədir və bu birliyi daim qorumaq bizim hər birimizin mənəvi borcumuzdur”.