Azərbaycan Respublikasının Prezidenti İlham Əliyev və Amerika Birləşmiş Ştatlarının Vitse-prezidenti Ceyms Devid Vens mətbuata bəyanatlarla çıxış ediblər.  

Azərbaycan Karate Federasiyası prezidentinin köməkçisi, mətbuat xidmətinin rəhbəri Vüsal Abdullazadə ilə müsahibə – Vüsal müəllim, Azərbaycan karateçilərinin III MDB Oyunlarındakı çıxışı böyük maraq doğurdu. Ümumilikdə bu nəticəni necə qiymətləndirirsiniz? – Bu, təkcə idman uğuru deyil, illərlə formalaşan sistemli işin, dövlətin idmana göstərdiyi diqqətin və federasiyanın məqsədyönlü fəaliyyətinin nəticəsidir. Mingəçevir “Kür” Olimpiya Mərkəzində keçirilən yarışlarda milli komandamız 16 medal (6 qızıl, 3 gümüş, 7 bürünc) qazanaraq lider federasiyalar sırasında yer aldı. Bu, Azərbaycan karate məktəbinin gücünü və peşəkarlıq səviyyəsini bir daha təsdiqlədi. – Bu uğurun arxasında hansı əsas amillər dayanır? – Ən böyük amil dövlət qayğısı və federasiya rəhbərliyinin düzgün strategiyasıdır. Federasiyanın prezidenti Ülvi Quliyevin rəhbərliyi altında həm idmançıların hazırlığı, həm də yarışlara təşkilati baxımdan yüksək səviyyədə yanaşılır. Məşqçi heyətimiz: Kişilər üzrə baş məşqçi Şahin Atamov, kata üzrə baş məşqçi Vahid Ayvazov, böyük məşqçilər Şahin Xudaverdiyev və Rəşad Hüseynov çox səmərəli iş aparıblar. Onların peşəkarlığı və fədakarlığı komandanın inamlı çıxışına zəmin yaradıb. – MDB Oyunlarına hazırlıq prosesi necə təşkil olunmuşdu? – Yarışlardan öncə iki mühüm təlim-məşq toplanışı keçirildi: biri Türkiyənin Mərmərə bölgəsində, digəri isə Qusar rayonunda. Bu toplanışlarda həm fiziki, həm taktiki, həm də psixoloji hazırlığa xüsusi diqqət ayrıldı. Bu proseslər nəticəsində komanda yarışlara tam formalaşmış və hazır vəziyyətdə çıxdı. – Qarşıda komandanı hansı beynəlxalq yarışlar gözləyir? – Hazırda çox intensiv dövrə daxil olmuşuq. Ən yaxın mərhələdə Fransada keçiriləcək dünya çempionatına lisenziya qazandıran kvalifikasiya yarışlarında iştirak edəcəyik. Ardınca İslam Həmrəyliyi Oyunları, daha sonra isə lisenziyalı idmançıların dünya çempionatı gəlir. Bundan əlavə, noyabrın 7-10-u tarixlərində yeniyetmə və gənclər arasında ölkə birinciliyi keçiriləcək. Həmin yarış nəticəsində formalaşacaq komanda 2026-cı ilin fevralında Avropa çempionatında Azərbaycanı təmsil edəcək. – Milli komandada gəncləşmə prosesi müşahidə olunur. Bu, planlı siyasətdirmi? – Bəli, tam şəkildə planlı prosesdir. Hazırda milli komandamızda yeni nəsil karateçilər yetişir. Bu, karatenin gələcəyi üçün vacib mərhələdir. Biz anlayırıq ki, nəticə qazanmaq zaman tələb edir.  Yaş kateqoriyası dəyişdikcə məsuliyyət də artır. Amma bu dəyişikliklər idmançıların daha yetkin və rəqabətədavamlı olmasını təmin edir. Təcrübə qazandıqca onlar beynəlxalq arenada da daha inamlı çıxış edəcəklər. – Federasiya rəhbərliyi və məşqçilər korpusu üçün bu nəticələr hansı mesajı verir? – Bu nəticələr göstərir ki, biz doğru yoldayıq. Ülvi Quliyevin rəhbərliyi ilə federasiyada formalaşan idarəetmə modeli artıq öz bəhrəsini verir. Biz yalnız nəticəyə deyil, həm də idmançılarımızın şəxsiyyət kimi yetişməsinə önəm veririk. Karate  idman növü eyni zamanda  nizam, hörmət və milli ruhun məktəbidir. Biz çalışırıq ki, bu dəyərlər yeni nəsildə daha güclü formalaşsın. – Sonda, bu uğurların davamlılığı üçün hansı hədəflər müəyyən olunub? – Əsas hədəf karatenin ölkəmizdə daha geniş yayılması və beynəlxalq səviyyədə Azərbaycan adının daha yüksəkdə ucaldılmasıdır. Federasiya olaraq çalışırıq ki, hər bir uğur dövlətimizin idman siyasətinə töhfə versin. Gənclərimizə nümunə olmaq, onların idmana marağını artırmaq və yeni çempionlar yetişdirmək bizim borcumuzdur. Əminik ki, dövlətimizin dəstəyi, federasiyanın planlı fəaliyyəti və idmançılarımızın əzmi sayəsində qarşıdakı illərdə daha böyük uğurlara imza atacağıq.

Prezident İlham Əliyev Y.Ə.Əliyevin 2-ci dərəcəli “Vətənə xidmətə görə” ordeni ilə təltif edilməsi haqqında sərəncam imzalayıb. Axar.az sərəncamın mətnini təqdim edir: "Azərbaycan Respublikasında milli dövlət quruculuğu işində xüsusi xidmətlərinə görə Yaşar Ədilxan oğlu Əliyev 2-ci dərəcəli “Vətənə xidmətə görə” ordeni ilə təltif edilsin". Qeyd edək ki, bu gün Yaşar Əliyevin 60 yaşı tamam olur.

Prezident İlham Əliyev Dünya Azərbaycanlılarının Həmrəylik Günü və Yeni il münasibətilə xalqa müraciətində son illər Azərbaycan Ordusunun inkişafı istiqamətində atılan mühüm addımlara diqqət çəkdi, gələcəklə bağlı planlardan danışdı. Prezident qeyd etdi ki, İkinci Qarabağ müharibəsi Azərbaycanın gücünü bütün dünyaya göstərdi. 2021-ci ildə Ermənistan-Azərbaycan sərhədində baş vermiş bəzi təxribatlar da Azərbaycanın üstünlüyü tamamilə öz əlində saxladığını sübut etdi. Komando qüvvələrinin yaradılmasına da toxunan dövlətimizin başçısı yeni hərbi qüvvələrin sayının yaxın gələcəkdə daha da artırılacağını bildirdi.   Prezident İlham Əliyevin bu fikirlərini Azərtac-a şərh edən Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov komanda qüvvələrinin yaradılmasının mühüm önəm kəsb etdiyini vurğulayaraq deyib: “Komando qüvvələrinin yaradılması Azərbaycanın hərbi gücünün artırılmasından, ordumuzun döyüş hazırlığının yüksəldilməsindən xəbər verir. Ali Baş Komandanın da qeyd etdiyi kimi, bu qüvvələr istənilən tapşırığı yüksək səviyyədə icra etməyə hazırdırlar. Biz İkinci Qarabağ müharibəsində xüsusi təyinatlılarımızın şücaətinə şahid olduq və onlar bütün dünyaya əsl qəhrəmanlıq nümunəsi göstərdi. İndi isə komanda qüvvələrinin timsalında Azərbaycanda yeni hərbi qüvvələr yaradılıb. Bu qüvvələrin gələcəkdə daha da artırılması nəzərdə tutulur. Hesab edirəm ki, komando qüvvələrinin yaradılması Azərbaycan Ordusunun hərbi qüdrətinin, zərbə gücünün daha da artırılmasına mühüm töhfə verəcək”.   Cəlil Xəlilov Azərbaycan Ordusunun hərbi qüdrətinin artırılması, dövlətimizin təhlükəsizliyi və müdafiə qabiliyyətinin gücləndirilməsi üçün yeni hərbi texnikaların alınmasının, bu məsələdə qardaş Türkiyə dövləti ilə hərbi əməkdaşlığın mühüm əhəmiyyət daşıdığını bildirərək deyib: “Azərbaycan dövləti ordumuzun ehtiyaclarına uyğun olaraq dünyanın ən qabaqcıl ölkələrindən bir sıra hərbi texnikalar, silah-sursat alır. Bu proses gələcəkdə də davam etdiriləcək. Bununla bağlı Azərbaycanın Türkiyə ilə hərbi əməkdaşlığı xüsusilə faydalı və səmərəlidir. Müharibə dövründə Türkiyədən alınan müşahidə və zərbə dronları Qələbənin qazanılmasına mühüm töhfə verdi. Azərbaycanlı mütəxəssislərin peşəkarlıqda idarə etdikləri bu dronlar düşmənin canlı qüvvəsinin, o cümlədən raket sistemlərinin, artilleriya qurğularının yerinin dəqiq müəyyənləşdirilməsində və məhv edilməsində mühüm rol oynadı. Türkiyə istehsalı olan bu dronların məhv etdiyi raketlər həm də Gəncə, Bərdə, Tərtər və digər şəhərləri, mülki insanları atəşə tutur, günahsız insanların qətlinə yol açırdı. Məhz bu dronlar həmin raketlərin məhvinə imkan verdi. Bununla da yüzlərlə mülki şəxsin təhlükəsizliyi təmin edildi”.   Respublika Veteranlar Təşkilatının sədr müavini qeyd edib ki, real döyüş əməliyyatlarında bu texnikaların, hərbi sistemlərin özünü yüksək səviyyədə doğrultması qardaş Türkiyənin, onun hərbi sənayesinin uğuru idi. Bütün bunlar göstərdi ki, Türkiyənin hərbi sənayesi dünyanın ən qabaqcıl hərbi sənayeləri ilə uğurla rəqabət aparmağa qadirdir və imkanlarını, nüfuz və təsir dairəsini sürətlə genişləndirməkdədir. Bu baxımdan istər “Aselsan”, istərsə də Türkiyənin digər hərbi təyinatlı şirkətləri ilə əməkdaşlıq Azərbaycan üçün olduqca önəmlidir. Bu, yalnız Ordumuzun müasir hərbi texnikalarla təminatı baxımından deyil, həm də Azərbaycanın hərbi sənayesinin inkişafı üçün böyük əhəmiyyətə malikdir.   “İnanıram ki, yaxın gələcəkdə Türkiyə ilə Azərbaycan arasında hərbi əməkdaşlıq mahiyyət etibarı ilə yeni mərhələyə qədəm qoyacaq. Bu əməkdaşlıq yeni və müasir hərbi məhsulların istehsalında özünü göstərəcək. Əməkdaşlığın bu şəkildə inkişafı həm Azərbaycanın, həm də qardaş Türkiyənin maraqlarına uyğundur. Bu, həm də bütövlükdə türk dünyasının gücünün artmasına, onun təhlükəsizliyinin gücləndirilməsinə xidmət edir”, - deyə C.Xəlilov əlavə edib.