Prezident İlham Əliyev Şimali Makedoniya Respublikasının Prezidenti Zati-aliləri cənab Stevo Pendarovskiyə məktub göndərib. Axar.az məktubun mətnini təqdim edir: “Ölkənizin milli bayramı – Müstəqillik Günü münasibətilə Sizi və xalqınızı öz adımdan və Azərbaycan xalqı adından ürəkdən təbrik edirəm. İnanıram ki, Azərbaycan ilə Şimali Makedoniya arasındakı dostluq və əməkdaşlıq münasibətlərinin inkişafı bundan sonra da xalqlarımızın mənafelərinə xidmət edəcəkdir. Bu bayram günündə Sizə ən xoş arzularımı yetirir, dost xalqınıza daim rifah diləyirəm

Veteran.gov.az xəbər verir ki, millət vəkili Pərvin Kərimzadə bayram öncəsi şəhid Hikmət Həsənovun ailəsini ziyarət edib. Millət vəkili bu barədə özünün sosial şəbəkədəki hesabında məlumat verib. Məlumatda deyilir:  “Nur üzlü Şəhidimiz Hikmət Həsənovun bizlərə əmanət olan yadıgarları, gül balalar Ruqəyya və Ruzini ziyarət etdik. ALLAH Şəhidimizə rəhmət eləsin ALLAH körpə balaları qorusun!” Seymur ƏLİYEV    

Veteran.gov.az xəbər verir ki, Cəlilabad rayon Veteranlar Təşkilatı alman faşizmi üzərində qələbənin 79- cu ildönümü ilə əlaqədar  tədbir  keçirib. Tədbirdə Əmək və Müharibə veteranları, şəhid ataları, qazilər və ictimaiyyət nümayəndələri iştirak ediblər. Tədbirdən öncə ikinci Dünya Müharibəsində və ölkəmizin ərazi bütövlüyü uğrunda  şəhid olan  həmvətənlərimizin  əziz xatirəsi bir dəqiqəlik sükutla yad edilib. Rayon Veteranlar Təşkilatının sədri Ədalət Salman çıxış edərək qeyd edib ki, İkinci Dünya Müharibəsində SSRİ-nin qazandığı qələbədə Azərbaycanın da böyük payı var. 600 mindən çox azərbaycanlı cəbhələrdə döyüşüb, Kiyev, Leninqrad, Stalinqrad  və Moskvanın müdafiəsində igidlik göstəriblər. O, müharibə illərində  qəhrəmanlıq nümayiş etdirmiş həmyerlilərimizin 130-dan çoxunun Sovet İttifaqı Qəhrəmanı adına layiq görüldüyünü, 200 minə yaxının isə orden və medallarla təltif olunduğunu xüsusi vurğulayıb. Tədbirdə çıxış edən Göytəpə şəhər 1 saylı məktəbin tarix müəllimi Fürudin Zeynalov, şəhid atası Nazim Paşayev, Ağsaqqallar şurası rayon şöbəsinin sədri Ədalət Əsgərov, Azərbaycan Yazıçılar Birliyinin üzvləri İman Abdulla, Mikayıl İnçəçaylı, Sakit İsayev, Dini Qurumlarla iş üzrə Dövlət Komitəsinin Cəlilabad nümayəndəsi Cavidan Rəşidov, veteran müəllimlər İsmayıl Məmmədov, Əsəd Əliyev, Muxtar Ağayev, "Qarabağ qaziləri" ictimai birliyinin sədri Maşalla Əliyev və başqaları bildiriblər ki, 1941-45-ci illərdə cəbhə üçün zəruri olan yanacağın 70-80 faizini Azərbaycan təmin etməsəydi sovet ordusu düşmənə qalib gələ bilməzdi. Şətəfli döyüş yolu keçmiş Azərbaycan övladlarının tarixi qəhrəmanlığı bu gün də yaddaşlarda yaşayır.

  28 fevral 2017-ci ildə Zəngilan rayon İcra Hakimiyyətində rayon Veteranlar Təşkilatının sədri, ehtiyatda olan kapitan, vaxtı ilə Zəngilan rayon komsomol, partiya və icraiyyə komitələrində müxtəlif rəhbər vəzifələrdə işləmiş, rayonun işğalından sonra Zəngilan şəhər ərazi icra nümayəndəsi olmuş Əşrəf Şükürovun 70 illik yubileyi münasibətilə tədbir keçirilib. Tədbirdə Zəngilan rayon icra hakimiyyətinin başçısı Ramiz Həsənov, icra hakimiyyətinin məsul əməkdaşları, rayon ictimaiyyətinin nümayəndələri, ziyalılar, Respublika Veteranlar Təşkilatının sədr müavini, ehtiyatda olan polkovnik Cəlil Xəlilov, Təşkilatın şöbə müdiri, ehtiyatda olan polkovnik Lətif Babayev və yubilyarın ailə üzvləri iştirak etmişlər. Tədbiri giriş sözü ilə açan Zəngilan rayon İcra Hakimiyyətinin başçısı Ramiz Həsənov Ə.Şükürovun çoxşaxəli ictimai fəaliyyətdən, keçdiyi şərəfli ömür yolundan, müstəsna xidmətlərindən söz açmış, onun bu gün də Veteranlar Təşkilatının sədri kimi rayonun ictimai-siyasi həyətında, gənclərin vətənpərvərlik ruhunda tərbiyə olunmasında yaxından iştirak etdiyini vurğulamışdır. R.Həsənov  Əşrəf Şükürovun xidmətlərinə görə 2009-cu ilin iyun ayında Azərbaycan Respublikasının Prezidenti İlham Əliyevin sərəncamı ilə Dövlət qulluğunda fərqlənməyə görə medalı ilə təltif edildiyini, onun əməyinin rayon rəhbərliyi tərəfindən də yüksək qiymətləndirildiyini bildirmişdir. İcra başçısı onu da qeyd etmişdir ki, əsl insan ömrü yaşamış Ə.Şükürovun həyatı, əməlləri gənc nəsil üçün layiqli örnəkdir. R.Həsənov  Ə.Şükürova təltif olunduğu Zəngilan rayon İcra Hakimiyyətinin Fəxri Fərmanını təqdim etmiş, ona cansağlığı, gələcək fəaliyyətində uğurlar arzulaməşdır. Tədbirdə çıxış edən Zəngilan rayon İcra Hakimiyyəti başçısının birinci müavini Seyfəddin Paşayev, şöbə müdiri Maya Bağırova, rayon Thsil şöbəsinin müdiri Zakir İbrahimov, Rayon Ağsaqqallar Şurasının sədri Xuduş İskəndərov, YAY-ın rayon təşkilatının sədri Əsəd Hüseynov, veteran Şərif Bəşirov, Təranə Şükürlü  və digərləri Əşrəf Şükürovun səmərəli fəaliyyətindən, yüksək insani keyfiyyətlərindən danışmış, onunla bağlı xatirələrini bölüşmüşlər. Respublika Veteranlar Təşkilatının sədr müavini, ehtiyatda olan polkovnik Cəlil Xəlilov Zəngilan rayon Veteranlar Təşkilatının sədri Əşrəf Şükürovun hazırkı uğurlu fəaliyyətinin təməlində dövlət orqanlarında çoxillik təcrübəsinin dayandığını qeyd edərək, onun yenə də sırada olduğunu, tədbirlərdə fəal iştirakı ilə fərqləndiyini bildirdi. Cəlil Xəlilov veteran hərəkatının güclənməsi sahəsində Azərbaycan Respublikası Prezidenti cənab İlham Əliyevin apardığı uğurlu siyasətdən, bugünki tədbirin həmin siyasətin bəhrəsi olduğundan danışmış,  Zəngilan rayon İcra Hakimiyyəti başçısının veteranlara qayğı ilə yanaşmasının digər rayonlar üçün yaxşı nümunə olduğunu vurğulamışdır. O, həmçinin idarəçilik sahəsində böyük təcrübəyə malik veteranların bu gün dövlət orqanlarına hərtərəfli dəstək olmalarının vacibliyindən, xüsusilə gənclərin vətənpərvərlik ruhunda tərbiyəsində onların iştirakının əhəmiyyətindən danışmış, Zəngilan rayon rəhbərliyinə və ictimaiyyətinə gələcək fəaliyyətlərində uğurlar arzulamışdır. 2016-cı ildə veteran hərəkatında göstərdiyi xidmətə görə Əşrəf Şükürovu Respublika Veteranlar Təşkilatının təsis etdiyi “Veteran həmrəyliyi” medalı ilə təltif edilmişdir. Ə.Şükürova rayon təşkilatları adından təbriklər və hədiyyələr təqdim edilmişdir. Əşrəf Şükürovu anadan olmasının 70 illik yubileyi və “Veteran həmrəyliyi” medalı ilə təltif olunması münasibətilə bir daha ürəkdən təbrik edir, ona yeni-yeni uğurlar arzulayırıq! Təranə ŞÜKÜRLÜ.