General-Polkovnik Hikmət Mirzəyev: Aprel Döyüşlərinin və Qarabağ Zəfərinin Sərkərdəsi Azərbaycan tarixində qəhrəmanlıq dastanları çoxdur. Xalqımızın hər dövrü igidlərin, qəhrəmanların və vətənpərvərlərin şücaəti ilə yazılıb. Əsrlər boyu millətimizin azadlıq və müstəqillik uğrunda apardığı mübarizənin rəmzi olan qəhrəmanlardan bəzilərinin adını çəkmək kifayətdir: Şah İsmayıl Xətayi, Babək Xürrəmi, Cavanşir, Koroğlu, Həzi Aslanov, Mehdi Hüseynzadə, Çingiz Mustafayev, Mübariz İbrahimov, Polad Həşimov, Zaur Nudirəliyev, İlqar Mirzəyev və daha yüzlərlə igidimiz... Onların hər biri Azərbaycanın azadlığı, torpaqlarının bütövlüyü və xalqımızın şərəfi naminə döyüşüb, ölməzliyə qovuşub. 2020-ci ilin payızında baş vermiş 44 günlük Vətən müharibəsi yalnız hərbi zəfər deyil, həm də xalqımızın milli birliyinin, qürurunun və sarsılmaz iradəsinin təntənəsi idi. Bu şanlı müharibənin ən parlaq simalarından biri isə Müzəffər Azərbaycan Ordusunun Xüsusi Təyinatlı Qüvvələrinin komandiri, general-polkovnik Hikmət Mirzəyev oldu. Onun rəhbərliyi altında həyata keçirilən uğurlu əməliyyatlar nəticəsində Cəbrayılın, Füzulinin və xüsusən də Şuşanın azad olunması Azərbaycan tarixinin ən möhtəşəm qəhrəmanlıq səhifələrindən birinə çevrildi. Hikmət Mirzəyev döyüş meydanında göstərdiyi soyuqqanlılıq, qətiyyət, cəsarət və strateji zəkası ilə düşmənə sarsıdıcı zərbələr endirdi, əsgərlərinə inam və ruh yüksəkliyi aşıladı. Düşmənin ən güclü müdafiə xəttlərini yararaq əlbəyaxa döyüşlərdə öz qüvvələrini qələbəyə apardı. Onun rəhbərliyi altında olan xüsusi təyinatlılar az sayda silah və texnika ilə, lakin böyük ruh yüksəkliyi və igidliklə düşməni geri oturtdular. Şuşanın azad olunması ilə Azərbaycanın qüruru və milli ruhu yenidən dirçəldi. Ali Baş Komandan İlham Əliyevin uzaqgörən rəhbərliyi, sarsılmaz iradəsi və qətiyyətli qərarları nəticəsində həyata keçirilən əməliyyatlar Azərbaycan Ordusunun qüdrətini, peşəkarlığını və yenilməzliyini bütün dünyaya nümayiş etdirdi. Qısa müddət ərzində əldə edilən tarixi Qələbə xalqımızın birliyinin, dövlətimizin siyasi iradəsinin və ordumuzun döyüş ruhunun parlaq təzahürü oldu. Qələbədən sonra Prezident, Müzəffər Ali Baş Komandan İlham Əliyevin şəxsən etdiyi təbrik isə general-polkovnik Hikmət Mirzəyevə göstərilən yüksək etimadın, inamın və dərin hörmətin ifadəsi idi. Bu təbrik, eyni zamanda onun rəhbərlik etdiyi qoşun hissələrinə yeni ruh, qürur və məsuliyyət hissi aşıladı. General-polkovnik Hikmət Mirzəyev üçün bu etimad daha böyük uğurlar və qələbələr naminə mübarizəni davam etdirmək üçün güclü stimul oldu.    Hikmət Mirzəyev yalnız 44 günlük müharibənin deyil, həm də 2016-cı ilin Aprel döyüşlərinin və Birinci Qarabağ müharibəsinin qəhrəmanıdır. Onun sərkərdəliyi, xüsusi təyinatlıların döyüş bacarığı, müasir texnikadan səmərəli istifadəsi və insan amilinə verdiyi önəm onu müasir Azərbaycan hərb tarixinin ən parlaq simalarından birinə çevirmişdir. Bizim hər birimiz ücün Şuşa sadəcə bir şəhər deyil, milli ruhun, mədəniyyətin, tarixin dirçəldiyi məkandır. Onun azadlığı üçün aparılan əməliyyat Hikmət Mirzəyevin rəhbərliyi ilə böyük qəhrəmanlıq nümunəsi oldu. General həmin günləri belə xatırlayırdı: “Şuşaya girəndə özümü çox xoşbəxt hiss etdim. Vicdanım içimdə öz cavabını tapmışdı. O vaxta qədər daim əziyyət çəkirdim. Orada bunu hiss etdim.” Ulu Öndər Heydər Əliyevin rəhbərliyi dövründən etibarən Hikmət Mirzəyev peşəkar hərbçi kimi daim inamla yüksəlmiş, öz fədakarlığı və xidmətləri ilə orduda xüsusi hörmət qazanmışdır. 2002-ci ildə general-mayor, 2020-ci ildə general-leytenant, daha sonra general-polkovnik rütbəsinə layiq görülüb. O, “Vətənə xidmətə görə”, “Azərbaycan bayrağı”, “İgidliyə görə” və digər orden, medallarla təltif olunub. Bu təltiflər onun vətənə sədaqətinin və xidmətinin ən yüksək qiymətidir.  Təşkilatımızın üzvləri çiyin-çiyinə döyüşdükləri silahdaşlarını, Vətən müharibəsinin müqəddəs Zəfərini qazanan igidlərimizi, arxa cəbhədə dua və inamla ordumuza mənəvi güc verən xalqımızı, şəhidlərimizin əziz ruhunu dərin ehtiramla yad edir və minnətdarlıqlarını bildirirlər. Tanrı sizi qorusun, cənab sərkərdə Hikmət Mirzəyev! Tanrı Azərbaycanı, onun qəhrəman oğullarını və bu xalqın yenilməz ruhunu daim uca eləsin!  Qarabağ Azərbaycandır və əbədi belə qalacaq!

13 sentyabr 2025-ci il tarixində Müharibə, Əmək və Silahlı Qüvvələr Veteranları Təşkilatı bir qrup 44 günlük Vətən müharibəsi qazisinin övladına məktəb ləvazimatları hədiyyə edib.  Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov adından şagirdlərə yeni dərs ilində uğurlar arzulayan Təşkilat şöbəsinin müdiri polkovnik Nadir İsmayılov, dövlətimizin şəhid ailələri və müharibə veteranlarına olan qayğısından danışıb. Polkovnik Nadir İsmayılov qeyd edib ki, Müharibə, Əmək və Silahlı Qüvvələ Veteranları Təşkilatı da öz növbəsində şəhid ailələri və veteranları tez-tez yad edir, öz imkanı daxilində həssas kateqoriyadan olan ailələrə dəstək göstərir. Bu dəstəyin bundan sonra da davam edəcəyini  bildirən Nadir İsmayılov, veteranlara diqqət və qayğı göstərməyin hər bir vətəndaşın mənəvi borcu olduğunu vurğulayıb.  

Azərbaycan Prezidenti İlham Əliyevin Brüsselə işgüzar səfəri bir çox mühüm məqamlarla yadda qaldı. Cənubi Qafqazın lider dövləti kimi çıxış edən Azərbaycanın həm NATO, həm də Avropa İttifaqı üçün etibarlı tərəfdaş olduğu, ölkəmizin yaratdığı reallıqların regional və beynəlxalq əhəmiyyət daşıdığı bir daha bəyan edildi.  Bununla yanaşı, yeni geostrateji şəraitdə şərtləri diktə edən Azərbaycanın postmüharibə dövründə proseslərin tənzimlənməsi ilə əlaqədar mövqeyinin dəyişməz olduğu növbəti dəfə öz təsdiqini tapdı.   Tarixi Qələbədən sonra ən mühüm görüş   Şübhəsiz ki, Azərbaycanın tarixi Qələbəsindən sonra Brüssel danışıqları ən mühüm – diqqətçəkən görüş kimi tarixə düşdü. Xüsusilə də, indiyə qədər əldə olunmuş razılıqlar bir daha təsdiqləndi, sülh müqaviləsinin imzalanması, kommunikasiyaların bərpası, sərhədlərin delimitasiyası və demarkasiyası  kimi məsələlərdə Azərbaycanın üstün mövqeyi növbəti dəfə əks olundu.   Regional nəqliyyat əlaqələrinin inteqrasiyası ilə bağlı çox mühüm fikirlər ifadə edildi. Dövlət başçısının diqqət yetirdiyi vacib məsələlərdən biri də Zəngəzur dəhlizi və onun hüquqi rejimi ilə bağlıdır. Sirr deyil ki, Azərbaycan Asiya ilə Avropa arasında mühüm nəqliyyat-tranzit xətti olacaq bu dəhlizin açılmasında güclü siyasi iradə nümayiş etdirir və müvafiq addımlar atır. Ümumiyyətlə, Zəngəzur dəhlizinin yaradılması məsələsi təkcə Azərbaycanın deyil, bütövlükdə, regionun siyasi gündəliyinin mühüm tərkib hissəsidir. Bu da təsadüfi deyil, çünki dəhlizin reallaşması həm ölkəmizin yerləşdiyi regionda, həm də Asiyadan Avropaya doğru geniş məkanda yeni siyasi-iqtisadi mənzərənin formalaşmasına zəmin yaradacaq. Bu ərazidən keçən nəqliyyat xətti bir çox dövlətin əməkdaşlıq imkanlarını genişləndirəcək. Ən vacib məqamlardan biri yeni kommunikasiya vasitəsilə Azərbaycanın Naxçıvan Muxtar Respublikası vasitəsilə Türkiyə ilə birləşməsi, Azərbaycanın əsas hissəsi ilə Muxtar Respublika arasında birbaşa quru əlaqəsinin yaranmasıdır. Təbii ki, bu, sosial-iqtisadi cəhətdən çox önəmlidir. Bütövlükdə, yeni infrastrukturun yaranması nəticəsində Azərbaycanın tranzit əhəmiyyətinin artması, iqtisadi inkişafının sürətlənməsidir. Təbii ki, Orta Asiya ilə Avropanı birləşdirən bu infrastruktur layihəsi digər region ölkələri üçün də iqtisadi fayda əldə etmək üçün perspektivlidir. Bu dəhlizin yaradılması elə Ermənistan üçün də tarixi şansdır. Ermənistan bu imkandan istifadə edərək dəmir yolu ilə həm İranla, həm də Rusiya ilə əlaqə yarada bilər ki, bu da iqtisadi mənfəət qazanmaq deməkdir. Azərbaycan Prezidenti qeyd etdi ki, biz Azərbaycandan Ermənistan vasitəsilə Naxçıvan Muxtar Respublikasına dəmir yolu əlaqəsinin tikintisi ilə bağlı razılıq, həmçinin magistral yol inşasına dair razılıq əldə etmişik. Lakin magistral yolun dəqiq marşrutu hələ ki, müəyyən olunmayıb. Bu, gələcək müzakirələrin mövzusudur.   Azərbaycanın dəhlizə dair haqlı mövqeyi bir daha təsdiqləndi   Ümumiyyətlə, Avropanın siyasi paytaxtında Zəngəzur dəhlizi boyunca dəmir yol xəttinin çəkilişi ilə bağlı konkret mövqeyin ifadə olunması  çox mühüm əhəmiyyətə malikdir. Azərbaycan Prezidentinin bu məsələ ilə əlaqədar yanaşması aydın idi, dövlətimizin başçısı bir daha mövqeyini konkret ifadə etdi. Ermənistan baş naziri Nikol Paşinyan isə üçtərəfli görüşdə Azərbaycan Prezidenti ilə dəmir yolunun bərpa olunması barədə razılığı təsdiqlədiklərini bildirdi. Öz növbəsində Aİ Şurasının Prezidenti Şarl Mişelin yaydığı bəyanatda dəmir yol xəttinin çəkilişi xüsusi olaraq qeyd olunub. Həmçinin dəmir yolunda gömrük və sərhəd nəzarətinin qarşılıqlıq prinsipi əsasında təşkil olunacağı vurğulanıb. Bununla da Azərbaycanın dəhlizə dair haqlı mövqeyi bir daha təsdiqlənib.   Laçın dəhlizində gömrük yoxdursa, Zəngəzur dəhlizində də olmamalıdır   Dövlət başçısının toxunduğu çox mühüm məsələlərdən biri Zəngəzur dəhlizinin hüquqi rejimidir. Ermənistan tərəfi bu məsələni spekulyasiya edərək fərqli beynəlxalq ictimai rəy formalaşdırmağa, təmasların əhəmiyyətini azaltmağa, dəhlizin inşası və istifadəyə verilməsi prosesini gecikdirməyə çalışır. Təbii ki, proses geriyədönməz xarakter daşıyır, şərtləri diktə edən Azərbaycanın üstün mövqeyi və həm regional, həm də regiondankənar bir sıra dövlətlərin yanaşması fonunda Zəngəzur dəhlizinin açılması labüddür. Ermənistan istəsə də, istəməsə də, dəhliz məsələsi reallaşacaq. Elə dəhlizin hüquq rejiminin müəyyən olunması da Azərbaycanın prinsipial yanaşması və beynəlxalq normalar əsasında olacaq. Prezident İlham Əliyev bu məsələdə ölkəmizin prinsipial mövqeyini birmənalı şəkildə ifadə etdi: “Bu gün Laçın dəhlizində gömrük yoxdur. Ona görə də, Zəngəzur dəhlizində də gömrük olmamalıdır. Əgər Ermənistan yük və insanlara nəzarət etmək üçün öz gömrük qurumlarından istifadədə israr etsə, onda biz Laçın dəhlizində eynisində israr edəcəyik. Bu, məntiqidir və qərar Ermənistan tərəfindən qəbul edilməlidir. Biz hər iki varianta hazırıq, ya hər ikisində heç bir gömrüyün olmaması, ya da hər ikisində hər iki gömrüyün olması”.   Sülh, sabitlik və inkişaf naminə   Bunlarla yanaşı, Prezident İlham Əliyev Azərbaycanın sülhyaratma prosesində və təhlükəsizliyin təmin olunmasında qətiyyətli mövqeyini – prinsipial yanaşmasını ortaya qoydu. O, Azərbaycanın sülhə, sabitliyə və proqnozlaşdırılmaya sadiq olduğunu bəyan etdi. “Bizim səylərimiz regionda hər hansı yeni müharibə risklərinin minimuma endirilməsi məqsədi daşıyır. Bunun üçün ən yaxşı yol kommunikasiyaların açılması, aktiv dialoqun qurulması və yenidən qonşu olmağı öyrənməkdir. Bizim siyasətimiz çox açıq və aydındır. Ümidvaram ki, əgər Ermənistan tərəfindən xoş məram olsa, biz təklif etdiyimiz kimi iki ölkə arasında sülh razılaşması üzərində işləyə və düşmənçiliyə son qoya bilərik”,-deyə Azərbaycan Prezidenti vurğuladı. Bu, o deməkdir ki, Ermənistan ərazi iddiasından əl çəkməli, ölkəmizin ərazi bütövlüyünü tanımalı və sülh müqaviləsini imzalamalıdır. Belə olan halda, Cənubi Qafqaz regionunda uzunmüddətli sülh və təhlükəsizlik mühitini təmin etmək mümkün olacaq. Bu, Ermənistan da daxil olmaqla regionda bütün dövlətlərin maraqlarına tam cavab verir, bölgə xalqlarına rifah və inkişaf vəd edir.   Nəticə etibarilə, Brüsseldə baş tutan görüşlər postmüharibə mərhələsində Azərbaycan dövlətinin tarixi qələbəsinin siyasi və diplomatik müstəvidə möhkəmləndirildiyini göstərir. Bu isə onu deməyə əsas verir ki, Prezident İlham Əliyevin cəsarətli addımları, qətiyyətli mövqeyi qarşıda duran bütün strateji hədəflərə çatmağa imkan verəcək.   Siyavuş Novruzov Milli Məclisin Regional məsələlər komitəsinin sədri