Bakı, 14 oktyabr, AZƏRTAC Rəşadətli Azərbaycan Ordusu tərəfindən Füzuli rayonunun Qaradağlı, Xatunbulaq, Qarakollu, Xocavənd rayonunun Bulutan, Məlikcanlı, Kəmərtük, Təkə, Tağaser kəndləri işğaldan azad edilib. Eşq olsun Azərbaycan Ordusuna! Qarabağ Azərbaycandır! AZƏRTAC xəbər verir ki, bu barədə Azərbaycan Respublikasının Prezidenti İlham Əliyev özünün rəsmi “Twitter” səhifəsində yazıb.

Azərbaycan Respublikası Müharibə, Əmək və Silahlı Qüvvələr Veteranları Təşkilatının 30 illik yubileyi çərçivəsində  17 oktyabr 2018-ci ildə Bakı şəhərində, “Park-İnn” hotelində Respublika Veteranlar Təşkilatının təşkilatçılığı ilə “Müasir dünyada təhlükəsizlik: qlobal və regional çağrışlar” mövzusunda beynəlxalq konfrans keçirilmişdir. Beynəlxalq konfransın iştirakçıları 16 oktyabr 2018-ci ildə ümummilli lider Heydər Əliyevin Fəxri Xiyabandakı məzarını, Şəhidlər Xiyabanını və iki dəfə  Sovet İttifaqı Qəhrəmanı Həzi Aslanovun məzarını ziyarət etmişlər. Dünyanın 17 ölkəsindən yüksək səviyyəli qonaqların, Azərbaycan Respublikasının dövlət orqanları, Parlament üzvləri, akademik və hərbi dairələri, ictimai təşkilatlarının, veteranlar, gənclər və media nümayəndələrinin iştirak etdikləri  tədbir başlamazdan əvvəl onun iştirakçıları bütün müharibə və terror qurbanlarının xatirəsini 1 dəqiqəlik sükutla yad etmişlər. Beynəlxalq konfransı giriş sözü ilə Təşkilatının sədri, general-polkovnik Tofiq Ağahüseynov açmışdır. O, İkinci dünya müharibəsində alman faşizmi üzərində Qələbənin 75-ci ildönümünə hazırlıq çərçivəsində belə aktual mövzuda beynəlxalq konfransın keçirilməsinin mühüm əhəmiyyət kəsb etməsindən danışaraq demişdir: “Bu günkü Beynəlxalq konfransın Azərbaycan Respublikasında keçirilməsi heç də təsadüfi deyil. İkinci dünya müharibəsində alman faşizmi üzərində qələbəyə mühüm töhfələr vermiş Azərbaycan xalqı bu gün özü Ermənistan Respublikasının təcavüzü ilə qarşılaşmış, həmçinin terror hücumlarına məruz qalmışdır. Azərbaycanın 20 faiz ərazisi hazırda Ermənistanın işğalı altındadır. Bu nəinki yalnız bizim ölkəmizin təhlükəsizliyinə qarşı deyil, hətta bütün regiona, dünyaya qarşı yönəlmiş ciddi təhdiddir. Ümid edirik ki, mövzusu birbaşa təhlükəsizliyin təminatı yollarının axtarılması, terrorun bütün forma və təzahürlərinə qarşı mübarizəyə həsr edilmiş bugünki beynəlxalq konfrans regionda və dünyada sülhün bərqərar olunmasına öz töhfəsini verəcəkdir”. Respublika Veteranlar Təşkilatının sədr müavini, ehtiyatda olan polkovnik Cəlil Xəlilov İkinci Dünya müharibəsində alman faşizmi üzərində böyük qələbədə danılmaz payı olan və bu gün terrorçuluğun bütün növ və təzahürlərinə qarşı mübarizədə birmənalı mövqe tutmuş Azərbaycan Respublikasının belə tədbirlərə ev sahibliyi etməsini onun mənəvi haquqi adlandıraraq demişdir: “Bu tədbir həm də xalqımızın bütün insanlığa, terror əleyhinə olan bütün ölkələrə ünvanlanmış sülh mesajlarıdır. Azərbaycan xalqı erməni terrorundan əziyyət çəkmiş xalq kimi bu gün onun qarşısının alınmasında dəyişməz və qətiyyətli mövqeyi ilə seçilir.  Azərbaycan daim də öz ənənələrinə sadiqdir və dünyada sülhün qorunmasında iştirakı özünün başlıca prioritetlərindən hesab edir. Ancaq tədbir iştirakçılarına da məlumdur ki, bizim 20 faiz torpaqlarımız bu gün Ermənistan hərbi birləşmələrinin işğalı altındadır. Ermənistan bu gün də Azərbaycan Respublikasına qarşı təcavüzkarlıq və dövlət səviyyəsində dəstəklənən terror siyasətindən imtina etməmişdir. Azərbaycan Prezidenti möhtərəm İlham Əliyev bütün xarici səfərlərində və ölkəmizdə həyata keçirilən rəsmi görüşlərində xarici dövlət başçıları və beynəlxalq ictimaiyyətin diqqətini dəfələrlə torpaqlarımızın Ermənistan tərəfindən işğal altında saxlanması faktına yönəltmişdir. Çünki təcavüzkarlıqla, terrorçuluqla mübarizə yalnız bir xalqın və dövlətin deyil, özünü sivil dünyanın təmsilçisi sayan hər bir xalqın və dövlətin üzərinə düşən vəzifədir. İkili standartlar kənara qoyulmalı, Ermənistanın birmənalı olaraq təcavüzkar, işğalçı və terroru dəstəkləyən dövlət kimi tanınmalıdır. Məhz belə obyektiv münasibət bölgədə sülhün bərqərar olmasına töhfə verər, yalnız Azərbaycanın ərazi bütövlüyünün və təhlükəsizliyinin təminatı üçün deyil, həmçinin ümumi inkişafa xidmət edən addım olardı. Biz buna ümid edir və məsələnin vaxtında həllini sülhə nail olunmasında, regionun təhlükəsizliyinin təminatında mühüm amil sayırıq”. Sonra Beynəlxalq konfransın iştirakçılarının mövzu üzrə çıxışları dinlənilmiş, məruzə və çıxışlar ətrafında müzakirələr aparılmışdır. RF Prezidenti yanında Rusiya Xalq Təsərrüfatı və dövlət xidməti Akademiyasının professoru, fəlsəfə elmləri doktoru Nizami Məmmədov, “Müstəqil Dövlətlərin Veteranlar İctimai Təşkilatları Beynəlxalq İttifaqı”nın sədr müavini Tkaçenko Vladimir İvanoviç, Respublika Veteranlar Təşkilatının sədr müavini, polkovnik Cəlil Xəlilov, “Dünya Veteranları Federasiyası”nın sədri Dan-Viggo Bergtun, Qazaxıstan Veteranlar İctimai  Birliyinin sədr müavini İsenqulov Aytkali, Ukrayna Veteranlar Təşkilatının sədri Şmakov Viktor Viktoroviç, Azərbaycan Aviasiya Akademiyasının kafedra müdiri, professor İbrahim Quliyev, Gürcüstan Müharibə və Silahlı Qüvvələr Mərkəzi Veteranlar Təşkilatının sədri Şubladze Tengiz Şalvoviç, Belarus Veteranların İctimai Birliyinin sədri Qordeyçuk İvan Arkadyeviç,  RF Prezidenti yanında Rusiya Xalq Təsərrüfatı və dövlət xidməti Akademiyası Jurnalistika Fakültəsinin dekan müavini Qonçarova Yuliya Sergeyevna, AR Prezidenti yanında Strateji Araşdırmalar Mərkəzinin elmi əməkdaşı, hüquq elmləri doktoru, Nəcibə Mustafayeva, Azərbaycan Dillər Universitetinin dosenti, politoloq Oleq Yuryeviç Kuznetçov və başqaları çıxış edərək keçirilən tədbirin əhəmiyyətindən, onun terrorçuluğa qarşı mübarizəyə, beynəlxalq sülhün təminatına töhfə verəcəyinə inandıqlarına əminliklərindən, İkinci dünya müharibəsində alman faşizmi üzərində qələbədə və hazırda sülhün qorunmasında xalqlar birliyinin oynadığı tarixi roldan danışaraq, öz ölkələrində bu istiqamətdə görülən işləri, tədbirləri qeyd etmişlər. Beynəlxalq konfransın işinə Respublika Veteranlar Təşkilatının sədri, general-polkovnik Tofiq Ağahüseynov yekun vurmuşdur. T.Ağahüseynov “Müasir dünyada təhlükəsizlik: qlobal və regional çağrışlar” mövzusunda Azərbaycan Respublikasının paytaxtı, Bakı şəhərində keçirilən Beynəlxalq konfransın işində fəal iştirak etdiklərinə görə çıxışçıların hamısına bir daha təşəkkür etmiş, belə tədbirlərin gələcəkdə də davam etdirilməsinin zəruri olduğunu bildirmişdir.

Hərbi prokurorun təqdim etdiyi qürurverici statistika hansı mətləblərdən xəbər verir? Məlum olduğu kimi, Azərbaycan Silahlı Qüvvələrinin inkişafı, ordunun peşəkarlığının və döyüş hazırlığının yüksəldilməsi Müzəffər Ali Baş Komandan İlham Əliyev tərəfindən bir nömrəli prioritet vəzifə elan edilib. Elə bu səbəbdən də dövlətimizin müdafiə və təhlükəsizliyinin təminatına ayrılan vəsait hər il müntəzəm şəkildə artmaqda, bu müstəvidə mühüm addımlar, ciddi yeniliklər həyata keçirilməkdədir. Məqsəd Azərbaycan Silahlı Qüvvələrinin zərbə gücünü, müdafiə qabiliyyətini yüksəltmək, onun dünya orduları içərisində onsuz da yüksək olan reytinqini daha da yaxşılaşdırmaq, dövlətimizin təhlükəsizliyinin etibarlı təminatını sığortalamaqdır.   Məhz bu səbəbdən də Prezident İlham Əliyev 5 yanvar 2026-cı il tarixində yerli televiziya kanallarına müsahibəsində Ordumuzun inkişafı ilə bağlı dövlət siyasətinin bundan sonra da qətiyyətlə davam etdiriləcəyini bildirib,  “mükəmməlliyin sərhədi yoxdur” deyərək heç bir uğurun son məqsəd olmadığını vurğulayıb: “Ermənistanın nümunəsi də gözümüzün qabağındadır. Bu müştəbehlik və yalançı özünütərif onların 2020-ci ildə, daha sonra isə 2023-cü ildə torpaqlarımızdan rüsvaycasına qaçmağa məcbur olmaları ilə nəticələndi. Buna görə də dərhal Silahlı Qüvvələrimizi gücləndirməklə məşğul olmağa başladıq. Xüsusilə İkinci Qarabağ müharibəsi həm güclü tərəflərimizi, həm də daha yaxşı nəticələr əldə etmək də daxil olmaqla, idarəetməni təkmilləşdirmək üçün fəal şəkildə işləməli olduğumuz sahələri açıq şəkildə nümayiş etdirdi. Çünki hətta Zəfərlə nəticələnsə və bizimki kimi müzəffər olsa belə, nəticə çıxarmaq üçün həmişə əvəzsiz bir təcrübədir. Mən məhz bunu əsas götürdüm. Güclü tərəfləri gözəl bilərək, eyni zamanda, biz lazım olanları düzəltməklə məşğul olduq. Hərçənd onların sayı az idi. Amma, necə deyərlər, mükəmməlliyin sərhədi yoxdur”. 23 yanvar 2026-cı ildə Baş prokuror Kamran Əliyevin rəhbərliyi ilə Azərbaycan Respublikası Hərbi Prokurorluğunda 2025-ci il üzrə və qarşıda duran vəzifələrin müzakirəsinə həsr olunmuş geniş kollegiya iclası Silahlı Qüvvələrimizin bu inkişafa doğru əzmlə addımladığını göstərir. Qeyd edək ki, kollegiyada hesabat məruzəsi ilə çıxış edən Azərbaycan Respublikası Baş prokurorun müavini-Azərbaycan Respublikasının hərbi prokuroru, ədliyyə general-mayoru Bəhruz Əhmədov ötən illə bağlı qürurverici statistika səsləndirib, maraqlı faktlara diqqət çəkib. Hərbi prokurorun çıxışından məlum olub ki, 2025-ci ildə hərbi prokurorluq orqanları tərəfindən qeydə alınmış cinayət hadisələrinin 99,7 %-nin açılması təmin edilib. Həmçinin, hesabat ilində qeydə alınmış hərbi xidmət əleyhinə cinayətlərin sayında 21.3 % azalma müşahidə edilib ki, bu da çox ciddi nailiyyətdir. Silahlı Qüvvələrdə hərbi xidmət əleyhinə cinayətlərin hər il ötən ilə nisbətən əhəmiyyətli dərəcədə azalması Prezident İlham Əliyevin bu sahəyə olan diqqət və qayğısının, ordu rəhbərliyi ilə prokurorluq orqanlarının birgə əməkdaşlığının, habelə, Müdafiə Nazirliyi, qoşun növü komandanlığı və Hərbi Prokurorluq əməkdaşlarının öz vəzifələrinə vicdan və məsuliyyətlə yanaşmasının nəticəsidir. Xatırladq ki, hər il Hərbi Prokurluq Müdafiə Nazirliyi və digər hərbi birləşmələrin rəhbərləri ilə birlikdə Silahlı Qüvvələrdə silsilə tədbirlər həyata keçirir, qanunçuluğun və nizam–intizamın gücləndirilməsi, milli-mənəvi dəyərlərin və Ulu Öndər Heydər Əliyev irsinin  təbliği, hüquqi maarifləndirmə və s. ilə bağlı mühüm addımlar atır. Hansı ki, bütün bu addımlar nəticə etibarilə Silahlı Qüvvələrdə nizam-intizamın güclənməsini, hərbi xidmət əleyhinə cinayətlərin azalmasını, hərbi qulluqçular arasında daha sağlam münasibətin formalaşmasını, vətənpərvərlik ruhunun yüksəlməsini təmin edir. Hərbi Prokurorun hesabat məruzəsində yer alan statistik rəqəmlər bu həqiqəti praktiki baxımdan təsdiq edir. Onu da xatırladaq ki, Hərbi Prokurorluq hərbi qulluqçular və onların ailə üzvləri ilə daha çevik ünsiyyəti təmin etmək, baş verən istənilən hadisəyə daha operativ reaksiya vermək, vətəndaşların arzu və istəkləri ilə tanış olmaq üçün səylərini davam etdirir. Bu məqsədlə 2025-ci ildə Azərbaycan Respublikası Hərbi Prokurorluğu üzrə “962-Etimad xətti” yaradılıb. Fəaliyyətdə olduğu 4 ay ərzində “962-Etimad xətti” üzrə 219 müraciət daxil olub. Bütövlükdə isə 2025-ci ildə Hərbi prokurorluq orqanlarına 1001 müraciət ünvanlanıb, 3702-si bilavasitə hərbi hissələrdə olmaqla ümumilikdə 5911 vətəndaş qəbul edilərək dinlənilib. Bütün bunlar Hərbi Prokruroluğun Silahlı Qüvələrdə apardığı işin miqyas və əhəmiyyətini göstərir. 2025-ci ildə əldə edilən bütün bu uğurlar onu deməyə əsas verir ki, 2026-cı ildə Hərbi Prokurorluq və Silahlı Qüvvələrimiz öz nailiyyətlərini davam etdirəcək, yeni müvəffəqiyyətlər əldə etməklə hər bir azərbaycanlıya qürur və sevinc hissi yaşadacaq. Seymur ƏLİYEV

12 dekabr 2025-ci il tarixində Novxanı kəndindəki “Hacı Səfəralı” məscidinin ərazisindəki mərasim evində Ulu Öndər Heydər Əliyevin anım günü ilə bağlı şəhid ailələrinin, veteranların, kənd ağsaqalları və ziyalıların iştirakı ilə ehsan süfrəsi təşkil edilib. İş adamı Cəlil Nağıyev tərəfindən təşkil edilən ehsan süfrəsində 210 nəfərə qədər şəxs iştirak edib. Tədbiri giriş sözü ilə açan məscidin axundu Hacı Ələsgər Mikayılzadə Ümummilli lider Heydər Əliyevin Azərbaycan xalqının həyatındakı tarixi xidmətlərinə toxunub, onun xilaskarlıq missiyasından bəhs edib. Ehsan süfrəsində iştirak edən Dini Qurumlarla İş üzrə Dövlət Komitəsinin Abşeron-Xızı regional bölməsinin müdiri Yalçın Abdullayev, BDU-nun tələbəsi Nüsrət Mirzəyev, tanınmış ziyalı Hacı Natiq Nağıyev, kənd ağsaqqalı Nuhbala Ağayev Ulu Öndərin Azərbaycanın dövlətçilik tarixində müstəsna yer tutduğunu, müasir Azərbaycanın məhz Ümummilli Liderin siyasi kursu, işıqlı ideyaları sayəsində öz inkişaf və əzəmətinin zirvəsində qərarlaşdığını vurğulayıblar. Sonda çıxış edən iş adamı Cəlil Nağıyev Heydər Əliyev ideyalarının bundan sonra da təbliğinin zəruri olduğunu vurğulayıb, Ulu Öndərin güclü, müstəqil Azərbaycan naminə gördüyü böyük işlərdən danışıb: “Ümummilli Lider Heydər Əliyevin xalqımız, dövlətimiz qarşısındakı xidmətləri, bu xidmətlərin Azərbaycanın müstəqil bir dövlət kimi yaşamasında, gücünə güc qatmasındakı önəmi hər kəs məlumdur. Heydər Əliyev yadelli işğala məruz qalan,  daxili qarşıdurmalardan əziyyət çəkən, sosial-iqtisdi vəziyyəti sürətlə ağırlaşan, milli-mənəvi dəyərlər sistemi aşınmaya məruz qalan Azərbaycanı yalnız bu bəlalardan xilas etməklə qalmadı. Xalqımızın böyük oğlunun bənzərsiz siyasi dühası sayəsində ölkəmiz tarixi və qarşısıalınmaz yüksəliş dövrünə qədəm qoydu. Qısa zamanda nizami ordunun formalaşması, daxili parçalanmalara son qoyulması, mərkəzi hakimiyyətin gücləndirilməsi, idarəetmənin bütün istqiamətləri üzrə gənc kadrların yetişdirilməsi, iqtisadiyyatın dirçəldilməsi və onun beynəlxalq tələblər səviyyəsində yenidən qurulması həyata keçirildi. Bütün bu addımlar Azərbaycan xaqlının və dövlətçiliyinin gələcəyini xilas etdi, onun təməllərini gücləndirməklə yanaşı, beynəlxalq arenadakı nüfuzunu da artıtdı. Bizim üçün qürurvericidir ki, Ulu Öndər Heydər Əliyevin siyasi kursu bu gün Müzəffər Ali Baş Komandanımızın tərəfindən böyük uğur və qətiyyətlə davam etdirilir. Biz də bir fərd, bir vətəndaş olaraq Prezidentimizin ətrafında sıx birləşməklə yanaşı, Heydər Əliyev ideyalarının təbliğində də fəal iştirak etməli, gənc nəslin bu ideyaları dərindən mənimsəməsini təmin etməliyik. Bu, həm milli kimliyimizin və tariximizin qorunub saxlanılması, həm də gələcək uğurlarımızın təminatı baxımından həyati əhəmiyyətə malikdir”. Ehsan süfrəsində Ümummilli Lider Heydər Əliyevin ruhuna dualar oxunub, Prezident İlham Əliyev siyasətinə dəstək ifadə olunub. Seymur ƏLİYEV